Minis i anons plan pour amelyor leta bann lekol |29 January 2011

Pli gran proze san dout i konstriksyon lekol Glacis primer ki pou komanse milye sa lannen e finanse par gouvernman Sesel ek Lasin.

Sa nouvo lekol pou annan tou bann fasilite ki neseser dan en lekol primer tel ki en lakres osi byen ki bann lasal ki zanfan i bezwen pour fer serten size spesyalize.

Minis pour Ledikasyon, Lanplwa ek Resours Imen, Macsuzy Mondon -- ki ti pe koz pandan en lasanble spesyal kot lekol Glacis zour larantre Lendi -- in dir ki i annan bann prosedir pour organiz konstriksyon sa batiman – pour ki letid bann zanfan pa ganny afekte.

“Nou annann bann teknisyen ki pe vin dan pei pour nou kapab asize e diskite ki mannyer nou pou organiz konstrikyon, e sa pou depan lo teren.”

“Par egzanp Mont Fleuri letan nou ti pe fer konstriksyon nou ti kapab gard zanfan la letan nou ti pe konstrir lekol, me Glacis nou pou ale nou pou regarde avek bann teknisyen ki laranzman nou kapab fer,” i ti azoute.

Apre ki tou bann laranzman in ganny fer, Minis Mondon in dir ki pou annan bann diskisyon avek  paran osi byen ki bann ki lo komite paran-ansennyan pour vwar ki bann pli bon fason zot pou komans bann travay.

An kitan lekol Glacis Lendi, Minis Mondon ti al vizit lekol segonder Beau Vallon, kot i ti eksplike ki zot in fer bann renovasyon par faz laba – pour fer ki bann etidyan S1 i antre dan bann laklas ki ase nef.

Sa ti komanse lannen pase letan sis laklas pour bann nouvo etidyan S1 ti ganny konplete.

“Nou kwar i enportan akoz zot in kapab antre dan bann laklas ki fek fer, e lanvironnman osi byen ki latmosfer ava en pti pe pli bon pour zot,” i ti dir.

Departman Ledikasyon in osi dir ki i annan ankor travay pour fer kot lekol Beau Vallon, tel ki konstriksyon en miray e en dezyenm seksyon sa lekol si resours i permet.

Parmi bann lezot lekol kot pe osi fer travay renovasyon i lekol Pointe Larue segonder.

Antretan Minis Mondon in osi dir ki son minister pe met bokou lanfaz lo nivo akademik dan bann lekol sa lannen, e travay pe fer pour amelyor nivo laprantisaz bann zanfan.

Sa pou atraver dyalog avek bann ansennyan dan lekol, e osi atraver bann paran ki merit pe zwe en rol prominan dan letid zot bann zanfan.