Follow us on:

Facebook Twitter LinkedIn YouTube

Archive - Archive 2004 - July 2013

Simon Amade i lans son nouvo albonm Kapris Lavi |23 July 2011

Simon Amade i lans son nouvo albonm Kapris Lavi

Sa nouvo travay avek tit Kapris Lavi i anvant depi trwa semenn dan bann landrwa labitid.

Dan en  antretyen avek Nasyon sa semenn, Simon i dir ki ziska prezan lavant pe al tre byen e reaksyon piblik i tre pozitiv e ankourazan.

Me akoz Simon, enn bann santer ki dimoun i apresye bokou, in pran sitan lontan depi son dernyen travay ki ti annan pour tit Nouvo Tan avan in vin avek sa nouvo koleksyon sanson?

Simon i dir ki in pas atraver en kantite leprev difisil e douloure sa bann dernyen lannen e sa, osi byen ki enpe dekourazman fas a bann pri tre ser pour arive fer e met en koleksyon sanson lo marse, in met li retar.

Me i ti admet ki kantmenm sa in toultan persevere e dousman dousman in arive konplet sa albonm ki son 7enm antou.

Parey son bann lezot albonm oparavan, dan sa enn osi Simon i tous bokou lo bann sityasyon e size ki konsern lavi toulezour.

“Nou lavi i annan son kapris. Nou lavi nou kapab met dan en balans e peze e nou ava remarke ki en zour i anler e en lot zour i anba net e tou sa bann kapris nou lavi toulezour nou bezwen konnen ki mannyer pour fer fas avek,” Simon i dir.

Simon i dir ki menm si in pran li bokou letan pour travay lo sa albonm, i byen satisfe avek rezilta. I dir ki i annan parmi bann sanson ki in ekri depi en bon pe letan e la in arive fer piblik tann zot.

Simon i krwar dan pran otan letan pour fer en travay byen ki piblik i apresye.

“Mon krwar dan pran letan pour fer en bon travay mizikal ki letan dimoun zot ekoute zot satisfe e otomatikman asosye avek sa santer, en travay ki orizinal,” Simon i dir.

Ziska aprezan Simon i dir ki bann sanson ki pe fer pli byen se Kapris Lavi limenm, Si Mon ti Konnen, Konfor e popouri sega Les Mwan Zwe ki en remix.

Simon, ki en manm sosyete oter e konpositer Seselwa (SACS), i dir i annan bokou devlopman an sa ki konsern lanmizik dan pei e i annan bokou nouvo santer e mizisyen e ki sa i byen me anmenmtan i ankouraz bann santer ek mizisyen pour vin manm SACS.

“Sa lasosyasyon pe fer son mye pour donn rekonnesans bann artis Seselwa e nou pa devret mank bann loportinite ki i kapab anmennen pour nou,” Simon ti dir.

Simon i fer rapel son bann fàn e tou dimoun ki enterese ki zot kapab kontakte li lo limero 2529718 si zot pa ankor ganny en CD. Avek li en CD i kout R100 e si en dimoun pe aste plis ki 25 CD sa pou kout R80.
Simon i profite pour remersye tou son bann fàn e piblik an zeneral pour zot sipor.

M-A. L.

» Back to Archive