Kominike Lapolis |03 September 2011

Tou le 3 sispe i reste Baie Ste Anne e zot aze 36, 26 e 23-an.

Parmi sa 3 sispe 2 ti ganny arete Zedi tandis ki enn ti ganny arete yer granmaten. Tou le 3 in ganny rimann e zot pou repas ankour le 16 Septanm.

Lapolis pe kontiny zot lanket dan sa ka vol.

**********

Guyto Figaro, en zonm 22-an ki reste Baie Lazare, in kondann 18 mwan prizon pour lofans vol kont en koup etranze.
Sa lensidan ti ariv Mardi Anse à la Mouche.

Swivan lanket dan sa ka, lapolis ti arive rekiper propriyete ki ti’n ganny vole pour sa koup.

Figaro pe egalman ganny prosekite pour plizyer lezot ka vol ki’n arive dan rezyon Baie Lazare tou dernyenman.

**********

Sa zonm 30-an ki reste Takamaka, drayver ‘pick-up’ ki ti enplike dan sa aksidan fatal ki ti arive Anse Forban Sanmdi swar in formelman ganny sarze pour lofans koz lanmor atraver dray dan en fason danzere.

Sa akize, ki’n ganny large lo plizyer kondisyon, pou repas ankour le 30 Septanm.

**********

En zonm 32-an ki reste Anse Norde, sispe dan 4 lensidan kas lakaz e vole ki’n arive Beau Bel ek La Retraite tou resaman, in pas ankour yer kot in ganny rimann. I pou repas ankour le 14 Septanm. Sa sispe ti ganny arete Zedi.

**********

En zonm 23-an ki reste Vilaz Pascal ki ti pe rimann depi boner sa semenn in formelman ganny sarze yer pour 2 ka vol ki’n arive dan distrik Beau Vallon pandan mwan Out.
Sa akize in ganny large lo serten kondisyon an kontan en kosyon 10,000 roupi.
I pou repas ankour le 8 Oktob.

**********

En zonm 24-an ki reste L’ilot, Glacis, sispe dan 2 lensidan kas lakaz e vole ki’n arive le 26 ek le 30 Out Majoie, in ganny rimann ziska le 9 Septanm. 
Sa sispe ti ganny arete Zedi.

**********

Rezilta letopsi fer lo lekor Daniel Asba, sa zonm 38-an sorti Caiman Estate Anse Boileau ki ti ganny ranmase mor obor semen dan Gravye, Anse Louis Zedi apremidi in demontre ki se lemorazi son larat (pancreatic haemorrhage) ki’n koz son lanmor.