Follow us on:

Facebook Twitter LinkedIn YouTube

Archive - Archive 2004 - July 2013

Kominike lapolis |12 September 2011

Lapolis in raporte ki zot pe fer lanket dan en ka ki zot pe tret koman mert ki’n arive Vandredi swar anvil. Viktim sa lensidan i Yannick Joubert, en garson 17-an ki reste Belonie.

Lapolis ti ganny enformen par en kou-d-telefonn ver 9er55  ki en zonm in ganny pike lo car park Lari Quincy.

Joubert ti ganny sertifye mor an arivan lopital kot i ti’n ganny transporte par lanbilans pour lasistans medikal.

Swivan lanket, en zonm 23-an ti ganny arete par lapolis Sanmdi granmaten (00er15) kot i reste semen Serret.

Sa sispe pe ganny detenir e i ekspekte pas ankour ozordi.
Antretan, lapolis pe kontinyen avek zot lanket.

*****

Analiz i konfirm lezo Jimmy Moustache

Lapolis in raporte ki analiz syantifik fer lo lezo ki ti ganny ranmase brile obor en lakaz Barbarons le 18 Mars sa lannen in konfirmen ki viktim sa lensidan trazik ti Jimmy Moustache, sa zonm 46-an ki son konpanny ti dir avek lapolis ti’n absant lakour depi le 3 Mars.

Sa madanm 33-an, ki ti ganny arete menm zour ki lapolis ti vwar sa lekor ki ti’n brile ziska i reste lezo, pe rimann an atandan son zizman dan sa zafer.

Letan sa lensidan ti arive Jimmy Moustache avek son konpanny ti pe reste ansanm dan sa lakaz obor kot sa bann lezo brile ti ganny dekouver.

» Back to Archive