Lerwa Sega François Havelock i met sa ‘Problenm’ ater |15 October 2011

Problenm i tit nouvo albonm par François Havelock e se Jacky Payet ki’n prodwi sa travay.

Mye koni konman lerwa sega, François i dir ki lontan i ti anvi “met sa problenm ater”,
“Mon byen kontan sa lour in sorti lo mwan e mon’n detay sa problenm byen menm,” i ti rakont zournal Nasyon.

Msye Payet i dir ki in pran 8 mwan pour travay lo sa albonm lo ki i annan plizyer sanson tel ki Grannwanr pa’n tenyen, Ase Profite, Pti Labourer, Disan Trister, Ed Li, Lucie O, Problenm e Kan ou pa se ou.

Touzour dapre Msye Payet, sa albonm pe vann tre byen e 2 sanson ki pe fer sikse i Problenm e Kan ou pa se ou.

Laplipar sanson lo sa albonm i nouvo, sof trwa ki’n ganny rearanze swivan demann bann siporter lerwa sega.
Albonm i anvant dan landrwa labitid lo Mahe e Praslin e i kout 125 roupi.

Bann mizisyen ki’n partisip lo sa albonm i Karen Jeannevol (gitar bas), Cyril Vital (gitar lid), Peter Jules (tanbour ek kibord), e Nabby Jules (tanbour).

G. G.