Lapolis i ogmant profesyonalizm son bann zofisye


18-October-2011

Bann zofisye ki'n konplet lantrennman dan en portre souvenir avek bann envite kot seremoni prezantasyon sertifika

Younit Operations Support ek Police Special Support Wing in pas en semenn avek direkter kour, Ron Bonnelame, pour aprann bann diferan fason pour ogmant zot kapasite servi bann akseswar travay tel ki baton, minot, defann zot lekor san bezwen servi en zarm.

Zot ti osi aprann diferan fason apros en sivilyen ki pe ganny vwar konman en danze potansyel, oubyen ki pe pe al komet en krim.

Lance Corporal Jean-Claude Marengo ti dir avek Seychelles Nation ki sa lantrennman i pa’n zis ranforsi sa ki zot ti’n deza aprann, me in osi agrandi zot konnesans.

«Dan nou travay nou rankontre diferan manm piblik dan diferan sityasyon e vi ki sak lokazyon i diferan e kapab ganny adrese dan diferan fason, nou pe aprann plis lo sa bann diferan fason pour apros sa bann sityasyon,» i ti dir.

Dan en seremoni ki ti fer kot Lakademi Lapolis Vandredi apremidi, sa 30 zofisye ti ganny rekonpanse avek sertifika.

Sa ti dan prezans Konmisyoner Lapolis Ernest Quatre, ki ti apre adres bann ki ti la e dir ki latas pour konbat krim ek lezot negativite i reste responsabilite e rol primordyal en zofisye lapolis.

«Sepandan en tel latas i vin avek bokou defi, e alors i tre enportan ki en zofisye lapolis i ekip son lekor mantalman e osi fizikman,» i ti dir.

«Souvannfwa lapolis i rankontre bokou difikilte dan son latas pour mentenir lord ek lape, e parler enn bann defi se pour kapab met bann agreser anba kontrol, dan en fason tre efikas e osi profesyonnel, pour evite ki i annan labi drwa bann endividi. »

Konmisyoner Quatre ti azoute ki i asire ki sa lantrennman i ava benefisye sa bann zofisye pour desarz pli byen zot responsabilite e ki zot in ganny ekipe avek bann zouti neseser pour fer fas avek bann defi ki zot ava kapab rankontre e ti swet zot bann sans.

Send your comment :

Name *

Email *

Comment *