Lakadans i retourn dan Freedom Square


28-October-2011

Sa enn Lakadans ki pou deroul apartir 8er30 diswar demen, Sanmdi le 29 Oktob, pou vwar partisipasyon plizyer artis lokal tre popiler telki Elijah, Chicco Martino, Reuben, Jean-Marc Volcy, Philip Toussaint, Jany, benn Metis, parmi lezot ankor.

Bann group etranze ki pou osi pran par dan Lakadans i sorti Moris, La Renyon ek Martinik.

Dernyen fwa ki Lakadans ti deroul lo Freedom Square ti pandan festival 2007 e pli gran lafoul ki sa spektak mizikal ti’n deza gannyen  ti la sa swar. Bann organizater pe ekspekte ankor en gran lafoul dimoun vin partisipe vi ki i pou deroul oplenner e dimoun pa pou bezwen peye.

Santer Patrick Victor, ki direkter artistik sa levennman, i dir ki piblik pa pou dezapwente sa swar avek kalite son ek lalimyer akoz Konsey Nasyonal pour Lar ansanm avek son bann partener in met zot resours ansanm pour asire ki piblik i ganny en spektak ki alaoter.

Msye Victor i dir ki sa pou en sans pour dimoun desann an fanmir vi ki i pou en spektak gratwit e vin apresye sa spektak lanmizik kot bann artis pou sant zot bann sanson ki tre popiler.

I ti osi dir ki la i moman pour piblik montre si zot apresye bann spektak live akoz i pa souvan ki i annan bann spektak koumsa vi ki napa en landrwa ideal pour sa.
 
Alor la i ou sans pour vin montre ou kreolite !

Fodre dir ki kot transpor i konsernen, komite lorganizasyon festival in fer laranzman pour tranpor piblik roule ziska granmaten.
 

Send your comment :

Name *

Email *

Comment *