Teat -Pirog Nanm i anmenn en mesaz for e reel lo eroin


28-October-2011

Serten sekans dan pyes teat Pirog Nanm

Drog, sirtou eroin, in vin en problenm mazer dan lasosyete e sa pyes ti fer sorti bokou pwen reel, menm bann ki bokou dimoun i souvannfwa evite koz lo la.

En pyes avek en leson par deryer, Pirog Nanm ti ganny devwale avek piblik dan en lasal Teat Nasyonal ki ti preski deborde avek dimoun.

Ekri e met ansenn par Mary-Vonne Eugenie, Pirog Nanm i montre dabor bann ekstremite ki bann dimoun ki servi eroin i pare pour pas ladan pour kapab ganny sa sibstans. Sa i enkli vol keksoz dan zot prop lakaz pour vann tel ki bizou, lenz, keksoz elektronik, e menm manze.

Sa pyes, ki annan kat senn, i enn tre edikatif e montre soufrans bann paran ki zot zanfan in fini adikt avek sa drog, bann sentonm ki bann adikt i gannyen tel ki ganny fre menm dan letan ansoleye, pa oule travay, dormi pour bann gran peryod letan pandan lazournen, ek lezot ankor.

Bann sekans i osi deroul otour 2 garson ek 2 fiy ki ti lo eroin, e bann problenm ki sa depandans ti anmennen dan zot lavi e lavi zot fanmir.

En mesaz tre for ki’n ganny pase avek piblik dan sa pyes se pour fer en zefor kolektif pour konbat sa fleo drog, sirtou eroin. Konmdir tantin enn sa bann adikt dan sa pyes : « En zig tousel pa tire salte, me en balye zig i netway byen e tir tou salte ».

Pirog Nanm i osi koz byen for lo bann realite ki arive otour lavant drog ki souvannfwa pa gannny koz lo la. Sa bann realite i enkli bann zenn ki pas zot lazournen vey patrol lapolis e averti bann trafiker si lotorite pe vin fer lafouy. Zot fer tousala zis pour ganny drog.

I osi en fe ki bokou trafiker drog i etabli en biznes legal ki vin konman en degiz pour sa kantite larzan ek byen ki zot pe akimile avek zot bann aktivite ilegal.

Me sa pyes i osi annan bann zistwar ere, tel ki Pol, en zenn garson ki ti kapab avek led ek sipor son fanmir, sorti dan en lavi labi pour vin en zenn ki pe fer sikse dan son lavi e kapab akonpli bokou, e osi enn ki menm annan son prop biznes koud.
 
En pyes ki realis e adres en size serye dan en fason direk, Pirog Nanm i en mesaz ki lasosyete i devret ekout byen e fer zot par pour azir lo la.

Send your comment :

Name *

Email *

Comment *