Artis lokal e rezyonnal i enpresyonn lodyans dan sware tradisyonnel |31 October 2011

Sa ti en sware tradisyonnel kot ti annan bann demonstrasyon lanmizik ek ladans sorti isi Sesel e osi dan larezyon.
Sa lannen, dan kad bann aktivite pour 26enm Festival Kreol, konpetisyon kanmtole ti fer lo nivo rezyonnal e venker dan sak rezyon ti pran par dan sa sware tradisyonnel.

Apard bann ladans kanmtole, ti osi annan lezot ladans tradisyonnel, demonstrasyon lenstriman tradisyonnel e plizyer kalite lanmizik.

Tou ti konmans avek en group kiltir sorti Larenyon, ki anba direksyon Jeannick Arhimann, ti prezant diferan kalite morso lanmizik baze lo stil Maloya – en form lanmizik tre popiler dan sa pei.

Ti osi annan Norville Ernesta avek son group Kanmouflaz, ki avek zot bann mizisyen ek danser, ti prezant bann bon morso moutya pour lodyans.

Patrick Prosper ek son bann etidyan dan group Soley sorti kot Lekol Lanmizik, ti fer demonstrasyon lanmizik tradisyonnel e Christophe Prea ek son group Sokwe ti perform bann sanson tradisyonnel metise.

Ti annan bon partisipasyon ek sipor piblik ki ti la pour sa lokazyon. Bann group finalis konpetisyon kanmtole ti answit  annan en demonstrasyon anviron 30 minit, swivi par enpe moutya avek group lokal Fek Arive.

Moutya ti osi ganny performen par group Tanmi  swivi par en demonstrasyon Madilo. En group avek en non ase egzotik – ‘Sanmem Ki’n Anmenn Nou La’ – ti perform moutya, tinge ek sega.

Sa levennman ti osi servi pour relans latroup nasyonal avek en regroupman 16 danser e 8 mizisyen.

Sa nouvo latroup, anba direksyon Marietta Matombe, ti perform bann ladans tradisyonnel, e osi byen ki en sega otantik ki ti’n zepise avek en latous modern. Sa spektak, ki ti ale pour plis ki 2erd-tan edmi, ti enn byen apresye par bann piblik.

Nou seri portre tire par nou fotografer Louis Toussaint i demontre serten bann performans kot sa sware tradisyonnel.