Spektak lanmizik Lakadans i fer vibre lavil Victoria |31 October 2011
Sa aktivite anyel, ki regroup artis lokal e rezyonal pour en sware animasyon mizikal, i enn ki manm piblik ti tre antisipe, e pour sa lannen, sa aktivite ti retourn ankor lo Freedom Square, apre ki i ti’n ganny organize pour detrwa lannen dan bann landrwa tel ki Sant Konferans Enternasyonal ek lasal Konsey Nasyonal pour Spor sitye Roche Caïman.
En bon nonm artis lokal ki’n byen etabli zot non, tel ki benn Metis, Elijah, Jany De Letourdie, Chicco, Reuben, Philip Toussaint ek Jean-Marc Volcy ti performen pandan sa sware.
Ti osi annan lezot artis kreolofonn sorti dan larezyon, tel ki benn Morisyen Rasminik ek Cooliz-I, benn kiltir sorti Larenyon ek benn Dicibel sorti Martinique. Sa lannen, sa levennman ti gratwit apre ki i ti enn peye pour bokou lannen.
Direkter artistik Patrick Victor i dir ki bann artis pour sa levennman in travay dir pour prepar zot bann akt lo lasenn, kot apard zot bann sanson ki zot ti pour sante, zot ti osi egey lafoul avek en performans teatral ki akonpanny zot sanson.
«Souvannfwa, en dimoun i aste albonm en artis ki i apresye en kantite, me i arive parfwa ler sa dimoun i vwar sa artis lo lasenn pe performen, i santi li dezapwente. Sa i akoz sa artis napa en performans konplet pour akonpanny son sanson, e sa i en keksoz ki nou’n fer sir ki bann artis ki’n pran par dan Lakadans pa pas atraver,» i ti dir.
E avek benn Metis ki ti pe akonpanny bann artis, en laganm vreman eksitan ti prezan pour sa sware. Avek en lekip organizater konplet, sakenn ti annan son louvraz pour fer sa levennman en sikse -- depi bann teknisyen son, direkter lo lasenn, enzenyer lalimyer e menm bann mizisyen ek vokalis.
Bann manm piblik ti kapab zouir bokou bann sanson familye ki zot abitye ekoute e en gran parti sa spektak osi ti baze lo partisipasyon lodyans, ki ti donn lanmen sante anmenmtan.
Lakadans 2011 in ankor enn fwa en sikse e lekip organizater i donn randevou manm piblik lannen prosenn pour ankor enn sa pli gran spektak mizikal dan Festival Kreol.