En nouvo sistenm desarz santralize pour La Digue


28-November-2011

Sa proze i ekpekte finanse par Labank Eropeen pour Lenvestisman e Lazans Franse pour Devlopman. Si tou keksoz i al dapre plan, sa proze i ekspekte komanse an 2013 e pou konplete dan 2-an.

Ler sa proze pou’n konplete, tou bann landrwa prensipal lo La Digue kot i annan bann kominote ava ganny konekte avek en sistenm desarz santralize.

Korporasyon Litilite Piblik (PUC) ki pe antreprann sa proze i ekspekte ki i ganny laprouvasyon avek sa bann lazans finansman dan premye kar lannen 2012. E osito ki sa i in vin en realite, en letid detaye lo fezabilite sa proze pou ganny fer avan ki proze i al lo tender e apre ganny enplimante.

Se Minis responsab pour Zafer Enteryer, Lanvironnman, Transpor ek Lenerzi, Joel Morgan, ki ti donn sa bann detay lo sa proze pour La Digue dan Lasanble Mardi pase.
 
Msye Morgan ti pe reponn en kestyon par manm elekte pour La Digue e bann Zil Pros Chantale Ghislain.

Manmzel Ghislain ti’n demann Minis pour enform zabitan La Digue lo plan son minister pour rezourd sa problenm ‘sewage’ lo sa zil.

Minis ti fer resorti ki an se moman napa en sistenm desarz santralize lo La Digue me i annan en sistenm septic tanks kot bann lakaz endividyel, apard ki kot en lotel ki li i annan son prop fasilite pour tretman desarz.

I ti dir ki en letid in deza ganny konplete pour enplimant en sistenm desarz santralize konpreansiv pour La Digue e ki PUC in servi rezilta sa letid konman en dokiman debaz pou rod finansman pour sa proze.

Me akoz i annan problenm ki asosye avek sa bann zafer desarz ki bezwen ponpe tanzantan vi ki i pe plen, manmzel Ghislain ti oule konnen si i dan plan minister pour fer en letid serye, konplet lo lefe ki sa problenm desarz i annan lo rezerv delo bwar lo La Digue.

Minis ti dir ki PUC in bezwen ogmant lakantite tretman klorinasyon e lezot tretman delo lo La Digue pour fer ki dimoun i kapab bwar akoz sa problenm enfiltrasyon par bann septic tanks.

I ti fer remarke ki se pour sa rezon ki gouvernman ti vwar li en priyorite parmi en kantite lezot proze pour zabitan La Digue annan en sant tretman desarz santralize.

Send your comment :

Name *

Email *

Comment *