En zonm i admit lopital swivan en aksidan Mont Fleuri


06-December-2011

Leta sa pick-up apre sa aksidan

Sa trwa zonm ti dan en pick-up ki ti tap dan en miray Mont Fleuri. Letan sa aksidan ti arive sa pick-up ti pe fer direksyon Plaisance sorti lavil e sa miray i lo lot kote semen.

En zonm aze 25-an ki reste Pointe Larue, ki ti pasaze deryer dan sa pick-up, i admit lo ward Lopital Seychelles pour dimal dan likou ek douler dan leren.

Dravyer ek en lot pasaze zonm aze 18-an, ki ti devan dan pick-up, in resevwar swen medikal apre ganny large.

Se bann zofisye lazans tenny dife ek sekour ki ti reponn lapel pour retir bann dimoun ki ti’n pri dan sa pick-up.

Dapre rapor ek lobzervasyon fer par lapolis, drayver in ganny dimal deryer son latet, lo son fron, lo son lipye e lo son lanmen kote dwrat.

Sa pasaze 18-an ki ti devan dan pick-up in ganny dimal dan likou, grife lo lebra e ti pe soufer ek douler lo son lekor.

Swivan sa aksidan ki ti ganny raporte avek lapolis ver 1er apremidi, drayver sa pick-up i dir ki i ti perdi kontrol son transpor e tap dan sa miray vizavi lekol International letan i ti pe esey say en loto ki ti devan li e ki en sel kou ti koup anndan kot sa lekol.
Lapolis pe fer lanket dan sa ka.

Send your comment :

Name *

Email *

Comment *