Follow us on:

Facebook Twitter LinkedIn YouTube

Archive - Archive 2004 - July 2013

Festival Lazenes i en moman lanmizman e osi refleksyon |12 December 2011

Festival Lazenes i en moman lanmizman e osi refleksyon

Minis Sinon pe adres lafoulSa ti mesaz Minis pour Lenvestisman, Resours Natirel ek Lendistri Peter Sinon dan son diskour pour ofisyelman lans Festival Lazenes 2011.

Seremoni louvertir ofisyel sa festival ti deroul kot Palais des Sports Sanmdi swar, kot en gran lodyans – la mazorite zot bann zenn – ti’n rasanble pour sa lokazyon.
 
Parmi bann envite ti Vis-Prezidan Danny Faure, plizyer minis, sekreter prensipal ek manm lasanble. Osi prezan ti sef egzekitif Konsey Nasyonal Lazenes, Vicky Van Der Westhuizen.
 
Festival sa lannen pe deroul anba tenm ‘En Lazenes Prospere’.

Pandan sware louvertir Sanmdi swar, tou ti konmans avek en moman silans, anmemwar bann dimoun ki’n perdi zot lavi resaman. Sa i enkli de frer ki ti noye Beau Vallon, bann ki ti mor dan sa de dife kot sant Mont Royal e Au Cap.

Apre lim konsey lazenes ti ganny zwe e tou dimoun ti debout byen fyer e donn lanmen sante.
 
En ladans par latroup lazenes ti met tou dimoun dan laganm, e sa ti swiv par en prezantasyon lo lekran, ki ti montre bann lakonplisman, aktivite ek lezot levennman ki’n mark kalandriye departman lazenes pandan lannen.

En performans ladans kot seremoni louvertir

Letan i ti pe adres lafoul, Minis Sinon – ki ti pe ranplas minis responsab pour Lazenes Vincent Meriton ki lo en misyon travay Latanzani -- ti dir ki bann zenn dan Sesel i ganny mete aker par gouvernman.

“Sak lannen, Festival Lazenes i sa levennman ki kouronn lakonplisman lazenes Seselwa. Bann levennman ki’n pran plas isi pandan lannen 2011 i montre vivasite lazenes, sirtou zot zwa de viv,” Minis Sinon ti dir.

Minis ti dir bann zenn ki sa semenn i zot festival e i en letan pour zot non selman anmize, me osi reflesir lo bann keksoz enportan dan zot lavi.

“Letan nou pe selebre Festival Lazenes nou bezwen kontinyen repete ki Sesel i ekspekte de nou bann zenn e sa se en lazenes responsab e disiplinen, enn ki partisipe e en lazenes ki anvi reisir dan zot lavi, e sa i zisteman ganny reflekte dan tenm pour sa lannnen, ki En Lazenes Prospere,” i ti dir.

Osi lo progranm pou sa sware ti en varyete manifestasyon artistik, tel ki sanson par plizyer artis lokal parey Ralf, Smash Kid, Lianna e Reuben.

Ti osi annan poenm e rakontaz lo bann topik moralite, avek lobzektif donn bann zenn bann pwen pour reflesir lo la.

Ladans pa ti manke, avek en demonstrasyon kanmtole byen zepise ki ti fer lafoul byen eksite e apre osi ladans modern “hip-hop” par group C.P.A.

Touzour Sanmdi, parmi lezot aktivite ki ti’n organize dan kad sa festival ti en Youth Bazaar e en Gospel Show lo zarden zanfan, en legzibisyon dan Sant Lazenes Riviere Anglaise, e sesyon karol kot lapos anvil.



Viziter kot legzibisyon Sant Lazenes (a gos) e kot Youth Bazaar dan zarden zanfan

Lezot aktivite ki’n progranmen pour sa semen i konpetisyon naze, latelye, foronm, aktivite edikasyonnel, lanvironnman e kominoter e osi seremoni prezantasyon pri.
Sa festival pou fermen ofisyelman Vandredi swar.

» Back to Archive