Lazenes i zwenn pour koz lo bann size pertinan


14-December-2011

Minis Meriton pe adres lodyans

Sa ‘Foronm Lazenes’, ki ti deroul kot lotel Le Meridien Barbarons, i form par bann aktivite dan kad Festival Lazenes, ki ti demare ofisyelman wikenn pase.

Sa rankont yer ti ganny organize par departman lazenes e ti annan prezans plizyer envite dan seremoni louvertir, tel ki Minis pour Devlopman Kominoter, Lazenes ek Spor Vincent Meriton, sekreter prensipal pour Lazenes ek Spor Denis Rose, sekreter prensipal pour ladministrasyon dan Biro Prezidan Idith Alexander, sef egzekitif Konsey Nasyonal Lazenes Vicky van der Westhuizen parmi lezot o zofisye gouvernman.

Madanm van der Westhuizen ti donn en rapor lo progre ki son departman in fer lo Konferans Lazenes ki ti fer lannen pase e osi progre lo Laspirasyon 2013. Son rapor ti tous bokou sekter ki annan pour fer avek lazenes, tel ki lagrikiltir, lasante, lakaz, ek tourizm.

Dan son ladres kot louvertir sa foronm, Minis Meriton ti demann bann zenn pour apresye lanpler latas ki devan zot dan bann diskisyon ki zot ti pou fer pandan sa lazournen e vin avek bann solisyon.

«En pwen enportan ki’n sorti dan bann deba se ki nou bezwen retourn kot sours nou sosyete – ki lafanmiy – pour nou asire ki bann zanfan e bann zenn i grandi dan en lanvironnman favorab e vin bann adilt responsab,» i ti dir.

«Zot bezwen pran enpe letan pour reflesir lo zot rol anver lasosyete, e ki mannyer pour ogmant zot konnesans pour ganny sa bon baz sosyalizasyon. Ledikasyon i kapab ganny servi pour anmenn sa sanzman dan mantalite ki nou pe ekspekte.»

Apre diskour Minis, bann zenn dan lasal ti ganny klase dan diferan group pour diskit lo bann size ki relye avek renesans moral, tel ki drog ek kriminalite, ledikasyon ek lanplwa, lekonomi ek teknolozi, lasante, lafanmiy, ek responsabilite personnel.

Apre bann diskisyon, bann rekonmandasyon ti ganny prezante avek bann zofisye departman lazenes.

Send your comment :

Name *

Email *

Comment *