Follow us on:

Facebook Twitter LinkedIn YouTube

Archive - Archive 2004 - July 2013

Rankont avek Dj Giorgio Bello-«Mon swaf pour prodwi lanmizik » |17 December 2011

Rankont avek Dj Giorgio Bello-«Mon swaf pour prodwi lanmizik »

DJ Giorgio Bello an aksyon

Si ou pa’n tann remix sanson Avek ou par Chicco ek Daniella, e I’m in love par Liba, mon krwar ou’n bezwen tann sa Kanmtole vs Pon De Floor vs Run the world (Girls). Tou dernyenman in osi remix sanson tre popiler Mon’n war ou par Ion Kid.
 
Ou ankor pe demann ou lekor lekel ki prodwi sa bann bon remix ki vreman so ki letan ou tande i demann ou zis kil pake e danse. Se pa lot ki Dj Giorgio Bello.

Dj Giorgio Bello, ki son vre non i George Belle, i aze selman 20-an e in fini etabli son lekor dan serk lanmizik Seychelles e nou zournalis ti zwenn li pour konn enpe plis lo li.

Sa rezidan Takamaka ki fek fini son trwazyenm lannen kot lekol Lar Vizyel dan Politeknik kot i ti swiv kour Computer Graphics ek Fine Arts, i dir ki son lentere pour lanmizik ti konmans tre zenn, a laz 4-an, kot i ti vwar li pe toultan zwe avek keyboard son papa Alain Belle ki li osi ti zwe sa lenstriman lanmizik. Sa ti enspir Dj Giorgio Bello pour kontinyen lo sa semen.

«A laz 12-an mon ti dekouver ki mon ti annan talan dan deejaying e mon ti konmans prodwi Kouvertir CD ki annan sanson I’m in love par Liba ki Dj Giorgio Bello in remix lanmizik e fer bann pti enstrimantal. An grandisan mon’n remarke ki sa in vin en laswaf pour mwan alors mon’n kontinyen devlop mon abilite ziska mon’n ariv kot mon ete ozordi,» i ti dir.

Dj Giorgio Bello, ki pa zis zwe lanmizik, in osi travay tre pros ek detrwa zenn artis lokal parey Ion Kid, Master Emel, Chicco ek Ruben kot in prodwi bann enstrimantal e remix pour zot.

«Avan mon fer en remix, mon gete si i annan louvertir pour mwan met en keksoz ek sa sanson epi mon ganny kontak avek sa artis e si i agree la mon al kot sa stoudyo kot i ti rikord sa sanson kot la mon pran son bann data, mon anmenn kot mwan e travay li dan mon fason. Letan mon’n fini mon pibliy sa travay lo mon website ki djgiorgiobello.blogspot.com e otomatikman i antre lo mon paz Facebook kot la mon bann fàn i ganny akse avek,» i ti eksplike.

Pour fer sa bann remix tre o nivo i normalman kout Dj Giorgio Bello bokou lannwit san sonmey. E i fer sa akoz i anvi akonplir son rev pour en zour ariv lo menm nivo avek en Dj enternasyonal, e sa se pa lot ki DJ David Guetta.

Lannen prosen, Dj Giorgio Bello i anvizaze fer en albonm anba son prop label ki ‘G-minor Records’ e travay plis avek bann dimoun ki pe ede promot li, tel ki Ion Kid, Liba e en prezantater lo Paradise FM – AAP.

«Mon ti a voudre pran sa loportinite pour remersye mon bann fàn, mon fanmiy ek zanmi pour zot sipor.  Mon konnen zot pe ekspekte bokou plis sorti kot mwan e mon garanti zot ki mon annan bokou ankor pe vini tre byento,» Dj Giorgio Bello ti fer resorti.

Beverley Freminot

» Back to Archive