Kominike Lapolis


07-January-2012

Le 1 Zanvye sa lannen sa zonm ti vol kote zanno en madanm kot Katedral Imakile Konsepsyon. Sa zanno i annan envaler 2,500 roupi.

Mwan pase, sa akize ti’n ganny arete, anmennen ankour e ganny sarze pour vol sennon en madanm dan son likou dan rezyon lavil, en sennon ki dapre son propriyeter i kout 59,000 roupi.
 
Swivan lanket, lapolis ti rekiper sa sennon ki ti’n fini ganny vann.
 
Sa akize parkont li i ti ganny large apre ki i ti’n pey en sonm larzan ki lakour ti’n enpoze lo li koman kondisyon pour son liberte provizwar.

Lakour ti’n egalman ordonn li pour pa komet okenn lezot lofans pandan letan ki i deor.

An kometan sa lofans vol le 1 Zanvye, sa akize in alor kas sa kondisyon lakour e in aprezan ganny rimann ziska le 20 Zanvye.

**********

Lapolis in egalman raporte ki son bann zofisye lo patrol Mont Fleuri in aret en zonm 22-an ki reste Pointe Larue an posesyon propriyete vole.
 
Sa bann propriyete i konpri en sennon lor pour en madanm ki ti’n fek ganny vole osi byen ki serten aytenm ki ganny servi pour koud ki sa zonm i dir i ti’n aste avek en lot zonm.
 
Sa madanm ki pa ti ni ankor ganny sans pour raport sa lensidan ti plitar idantifye sa sispe ki ti’n vol son sennon dan son likou e remersye lapolis pour zot bon travay.

Sa sispe ki’n ganny anmenn ankour yer apremidi in ganny sarze e ganny large pour li repas ankour le 13 Zanvye.

Send your comment :

Name *

Email *

Comment *