Gran logmantasyon dan lakantite ka dife an 2011 |10 January 2012

Dapre sa lazans, 473 ka ti ganny raporte lannen pase, konpare avek 374 an 2010. 
Pour 2011, 44 lensidan ti ariv avek batiman, 10 veikil, 123 dife brousay, 3 ka bato, 7 ka koze par elektrisite, 36 bann lezot ka, e de fo rapor.

I annan sis dimoun ki’n perdi zot lavi dan bann ka dife ki’n arive lannen pase.
Depite sef sa lazans, Albert Rose, ti dir avek Seychelles Nation ki kou domaz pour bann dega koze par dife lannen pase in estimen ariv apepre R30,238,150, konpare avek R20,204,425 pour lannen 2010.

Pli gran kantite dife rikorde lannen pase i bann dife brousay, kot 42 ka ti ganny raporte dan mwan Me selman.

In annan mwens ka lannen pase kot dife ti okazyonnen par elektrisite – selman 7 ka.
«Zanvye 2011 ti mwan kot nou ti ganny plis ka dife, avek 57 rapor, e Septanm nou ti anann mwens ka dife avek 21 rapor,» Msye Rose ti dir.

«Me nou’n osi remark en amelyorasyon avek bann fo rapor ki manm piblik i fer, kot nou’n ganny selman de fo rapor lannen pase konpare avek senk an 2010.»

Msye Rose ti dir ki bann dife ki zot soupsonnen in ganny mete par ekspre i normalman ganny mete dan lanmen lapolis e ziska prezan in annan plizyer ka dan ki lanket i ankor pe ganny fer.

«An 2011 nou’n ganny 12 ka ki nou konsider konman arson (mete par ekspre) e 20 ka ki nou konsider konman neglizans,» i ti dir.

«I malere ki 2011 in termin avek en dife e 2012 in konmans avek en lot dife me nou pou kontinyen edik dimoun lo bann fason ki zot kapab protez zot propriyete,» Msye Rose ti dir.
 
Msye Rose i dir ki sa lannen lazans servis tenny dife i annan plan pour pas kot bann lakaz endividyel pour donn bann rezidan konsey, e osi fer miting dan bann kominote e met lansenny enpe partou.