Lazans Proteksyon Sosyal i lans son kanpanny ledikasyon dan distrik |03 February 2012

Sa kanpanny pou lanse pandan premye miting piblik ki departman devlopman kominoter pe fer dan distrik Roche Caïman ozordi 5er apremidi.

Zabitan Roche Caïman pe ganny envite pour vin partisip an gran nonm dan sa miting ki pou deroul dan sant kominoter sa distrik.

En portparol sa lazans in dir ki son bann zofisye pou la pour donn lenformasyon, koz avek dimoun e osi reponn nenport kestyon e donn leklersisman manm piblik.

I ti dir ki bi sa kanpanny, ki pou deroul dan tou bann distrik ler sa bann miting piblik i fer, se pour asire ki dimoun i annan otan lenformasyon posib lo sa lazans ek son fonksyonnman. 

Sa kanpanny i osi form parti bann aktivite ki departman devlopman kominoter pe organize pour sa lannen anba tenm nasyonal Travay Dir Pour Nou Sesel.

Sa lannen bokou lanfaz pe ganny mete lo travay distrik e pandan sa bann miting tou distrik pe ganny ankouraze pour mont en legzibisyon ki montre fason zot travay e fonksyonnen, koumsa bann dimoun ki vin miting a kapab vwar.

Osi prezan pandan miting pour tou bann responsab dan distrik ki dimoun pou kapab zwenn e koz avek apre rankont.

Zofisye devlopman progranm dan departman devlopman kominoter, Norlis Rose-Hoareau, i dir i enportan ki bann dimoun dan distrik i pran par dan sa bann miting akoz la i sans pour zot zwenn bann responsab zot distrik pour met zot konsern devan e osi donn zot kontribisyon pour plis progre e devlopman dan distrik.

Apre Roche Caïman, miting pou fer demen, Sanmdi le 4 Fevriye, Anse Boileau dan sant kominoter 9er bomaten, Anse Aux Pins dan sant kominoter 2er apremidi e Au Cap kot lekol primer 2er apremidi.

Zour e ler ki miting pou fer dan bann lezot distrik pou anonse o fir e anmezir.