Kominike Lapolis


18-February-2012

Dianna ti’n perdi konnesans letan ki lapolis ti asiste li sorti kot son manman Grand Anse Mahe ver 3er55 granmaten e ver 5er30 lapolis ti ganny enformen ki i ti’n mor.

Sa lensidan ti swiv lapel pour lasistans par manman Dianna ver minwi edmi. Manman Dianna ti’n telefonn lapolis e raporte ki son laport lakaz ti ouver e i pa ti trouv son 2 fiy – enn 13-an e lot 16-an – ki i ti’n dispit avek avan ki i ti al dormi.

Zofisye lapolis kordgard Anse Boileau ti reponn sa lapel e plitar zot ti ganny lasistans NCSD.  Ti ver 3er bomaten ki sa fiy 13-an ti ganny trouve pe kasyet anba lili e en pti moman apre avek lasistans lisyen Dianna ti ganny trouve dan brousay par lao kot lakaz e i ti ganny remet avek son manman. Lapolis ti demann manman Dianna pour gard lape e raport kot Family Support Squad yer bomaten avek son zanfan.

Serten zofisye ti raporte ki apenn zot ti’n kit sa landrwa pour al fer en lot travay pa lwen obor, ki zot ti retourn kot sa menm lakaz apre ki i paret zot ti’n tann en tapaz parey kriye. Ler zot ti arive zot ti trouv sa fiy ater. Sa manman ti dir ki son fiy ti pe asize lo sez e zis en sel kou i ti tonbe.

Lapolis pe fer lanket dan sa ka annatandan rezilta letopsi pour determin lakoz son lanmor.

**********

Lapolis in osi raporte pli boner sa semen ki zot pe fer lanket dan plizyer ka lye avek lofans frod.
Dabor i annan en madanm avek 2 zonm ki’n formelman ganny sarze sa semenn devan lakour mazistra pour 5 diferan lofans frod. Sa i an relasyon avek en ka kot en koup aze Franse ki ti’n lwe en loto ti fer en aksidan e sa biznes ti enterfer avek kart kredi sa koup e retir serten sonm sibstansyel lo zot kont san zot lotorizasyon.

Lot ka ki lapolis pe fer lanket ladan i enn kot 2 zonm ki travay avek en lazans ki tir kargo pour bann biznes in ganny sarze lo plizyer ka an konneksyon avek lofans frod. Sa 2 akize ti pas devan Lakour Siprenm Mardi apremidi e zot ka in ganny anvoye pour le 6 Mars sa lannen. Tou le 2 in ganny large lo serten kondisyon sever.

Lapolis in egalman dir ki zot pe fer lanket lye avek frod dan 3 lezot lorganizasyon piblik. Sa i departman lasante, departman lanvironnman ek trezor.

Finalman lapolis in raporte ki i annan serten endividi ki pe servi non serten lorganizasyon avek ki zot in deza anploye pour zot ganny larzan lo fo preteks. Lapolis pe alors lans lapel avek manm piblik an zeneral pour pa tonm dan sa kalite pyez e raport sa bann ka kot son bann stasyon pli pre.

 

Send your comment :

Name *

Email *

Comment *