Kominike lapolis |25 February 2012
Sa rapor ti ganny anrezistre kordgard Anse Etoile par sa deteni miner apre ki sa deteni adilt ti’n ganny large 2 a 3 semenn pase. Sa deteni miner ti raporte ki son agreser ti menas li e anpes li fer tapaz pandan ki i ti pe ganny abize.
Lanket ki pe ganny fer i enn kriminel kont sa sispe adilt pour lofans labi seksyel, tandis ki lot lanket Komisyonner Lapolis Ernest Quatre in met dan lanmen younit zafer entern.
Komisyonner lapolis in fer resorti ki si zanmen i ganny etabli ki en tel lensidan parey in arive, aksyon sever pou ganny pran kont nenport zofisye ki responsab lefe ki i kler dan prosedir detansyon ki en miner pa devret ganny mete dan menm kaso ki en adilt.
**********
Lapolis in egalman raporte ki en zonm 39-an ki reste St Louis ek en zonm 52-an ki reste Beau Vallon in ganny arete e pe ganny trete konman sispe dan sa lensidan vol arme ki ti arive kot ‘Cash Plus Exchange’ lo Lari Albert Zedi apremidi.
Sa 2 zonm ki ti ganny arete tar yer bomaten dan zanmerant erport in pas ankour yer apremidi kot zot in ganny rimann ziska le 5 Mars, antretan ki lapolis i konplet zot lanket.
Dapre propriyeter ‘Cash Plus Exchange’, en sonm anviron 200,000 roupi ti ganny vole Zedi apremidi letan ki sa sispe ti antre dan lofis son biznes, menas le sel travayer madanm ki ti la sa letan avek en gran kouto, met li dan minot, vole apre sorti e sove. En porsyon sa larzan in deza ganny rekipere par lapolis.
Sa lensidan ti ganny raporte avek lapolis ver 1er20 apremidi.
Lapolis in osi dir ki zot vreman apresye korperasyon ek lasistans ki manm piblik pe aporte an relasyon avek sa lanket e pe demann zot pour kontinyen asiste zot dan zot travay toulezour pour ede konbat krim ek bandisite dan pei.
**********
Lapolis in osi raporte ki rezilta letopsi fer lo lekor Dianna Lespoir, sa fiy 16-an sorti Grand Anse, ki ti mor kot klinik Anse Boileau granmaten Vandredi le 17 Fevriye in demontre ki se lenfeksyon dan son poumon ki’n koz son lanmor. Swivan zot lanket, lapolis in fer resorti ki napa malis ouswa ‘foul play’ dan lanmor Dianna.