Kominike Lapolis |03 March 2012

Lapolis in raporte ki ziska prezan zot in aret e kestyonn 3 zonm swivan zot kanket dan sa ka ki zot pe tret koman mert.
Antretan lanterman Msye Magnan ti fer Zedi.

Pandan ki lanket i kontinyen lapolis pe ankor enn fwa demann manm piblik ki annan lenformasyon ki pou ed zot atrap e anmenn devan lazistis sa ki responsab pour lanmor Msye Magnan pour silvouple kontakte biro CID.

Lapolis in garanti ki tou lenformasyon ki zot resevwar pou ganny trete avek konfidansyalite.

**********

Lapolis in raport lanmor Daniella Capolino, sa madanm ki ti’n admit enkonsyan dan younit swen entansif Lopital Sesel apre ki i ti tonbe san konnesans dan prezans zofisye lapolis kot lakaz son konpanny letan i ti pe retir serten son bann propriyete.

Madanm Capolina, ki ti mor 8.30 Zedi swar, ti konplenan dan sa ka raporte avek lapolis ki son konpanny, en zonm 63-an, ti’n vid bennzin lo li.

Sa zonm sispe ti ganny arete e plitar ganny large swivan levidans ki lapolis ti’n ranmase e ti pe aprofondir lo la pour permet zot etablir si i annan rezon pour en sarz formel ganny anrezistre kont li.

Lapolis ti pe egalman fer lanket kont Madanm Capolino an relasyon avek en ka labi fizik lo garson sa sispe ki annan 15-an.
Lapolis pe esper rezilta letopsi pour konn lakoz son lanmor.

**********

Lapolis in raporte ki Justin Sirame, sa zonm 49-an sorti Foret Noire ki ti’n ganny sarze e ti pe rimann koman akize dan ka mert Tessia Mousbe, in kondann lavi prizon.
 
Dan sa zafer ki zizman ti ganny pase Zedi swar, bann manm ziri ti trouv Justin Sirame koupab e ziz ti pas santans lavi prizon lo li.

Msye Sirame ti ganny arete le 4 Zen aswar lannen pase swivan en lensidan Foret Noire kot Tessia Mousbe ti’n ganny pike e mor Lopital Sesel son landmen bomaten le 5. Mousbe ti aze 26-an.