Kominike Lapolis


22-March-2012

Lekor sa zonm ti ganny dekouver dan en pti lakaz abandonnen par deryer kot exchange Cable & Wireless sitye St Louis.

Ti ver 2er24 yer apremidi ki lapolis ti ganny enformen lo sa lensidan. Dapre rapor i annan enpe plis ki en semenn depi ki dimoun pe santi en loder dan sa landrwa me personn pa’n port atansyon lefe ki pwason e osi zannimo mor i parfwa ganny zete dan sa kwen.

Lapolis pe demann manm piblik ki manm zot fanmiy in absante kot lakour pour plis ki en semenn pour kontakte kordgard pli pre.

Antretan, lapolis pe esper rezilta letopsi pour determin lakoz lanmor sa zonm ki son lekor in ganny ranmase.

**********

Lapolis pe egalman ankor enn fwa demann Zerah Payet, sa fiy 14-an ki’n absant lakour son paran Barbarons pour anviron 2 semenn deza, pour kontakte son fanmiy ouswa kordgard pli pre.
Nenport dimoun ki konnen kote Zerah Payet i ete zot egalman ganny demande pour enform lapolis irzan.

Send your comment :

Name *

Email *

Comment *