Lorite distrik i demann plis konsiltasyon minister


23-March-2012

Sa mosyon, ki ti ganny met devan par manm lasanble pour Grand Anse Mahé, Lenny Lebon pandan sesyon Mardi, ti ganny aprouve par tou manm Parti Lepep. 

I ti demann bann departman gouvernman ek bann lazans pour devlop bann mekanizm neseser ki ava permet annan plis konsiltasyon avek lotorite distrik.

Onorab Lebon ti fer resorti ki i egziste serten degre konsiltatsyon me i pa ase.
I ti dir ki zot apresye ki i annan serten sizesyon ki vin devan lotorite distrik me konsiltasyon pa devret  ganny fer lo zis serten dosye selektif.

“Tou dosye ki ganny fer lo devlopman dan distrik i devret annan lenportans partikilye pour lotorite distrik,” i ti azoute.

I ti dir ki se lotorite distrik -- ki enkli manm Lasanble Nasyonal osi byen ki ladministrater distrik -- ki annan sa kontak direk avek lepep e i enportan ki zot konnen ki pe pase, me non pa ganny konsilte apre ki proze in fini komanse.

Onorab Lebon ti azoute ki Prezidan James Michel in donn legzanp e nou devret servi konsiltasyon koman en zouti efektiv e efikas pour fer bann distrik bouze.

Lider lopozisyon dan Lasanble Nasyonal, David Pierre, ti dir ki i devret annan bann mekanizm neseser ki permet tou dimoun dan distrik pour zwe en rol dan sa prosesis devlopman.

« Distrik i ganny zere prensipalman par en ladministrater distrik e sa dimoun i osi en reprezantan Parti Lepep. »
I dir napa okenn lespas pour lopozisyon zwe en rol aktiv dan devlopman son distrik.

I ti azoute ki menm si en parti politik pa ganny elekte dan en distrik, i pa vedir ki sa parti napa en rol pour zwe dan devlopman sa distrik.

Onorab Pierre ti dir ki i devret annan en konsey distrik ki a garanti partisipasyon tou parti politik dan devlopman ek desizyon son distrik.

Parmi bann lezot manm Parti Lepep ki ti koz lo sa mosyon ti Derek Samsom, Mirena Souris, Charles Decommarmond, Nichole Barbe e Maria Payet-Marie.

Send your comment :

Name *

Email *

Comment *