Kominike Lapolis |26 March 2012

Lapolis ti ganny enformen lo sa lensidan ver 1er54 apremidi. Se en madanm ki ti telefonn lapolis e dir i paret ki sa zonm pa ti pe bouze.
Lekor Msye Agathe i lakaz mor e lapolis pe esper rezilta letopsi pour determin lakoz son lanmor antretan ki lanket preliminer pe ganny fer dan sa ka.

***
De garson in admit Lopital Seychelles, enn lo ward e lot dan ICU, apre ki transpor ki zot ti ladan ti enplike dan en aksidan lo highway yer granmaten.

***
En garson ki ti ganny tape avek en loto lo semen Mont Fleuri anfas Jivan’s Complex, Sanmdi swar, in ganny admit Lopital Seychelles. Son kondisyon in ganny dekri konman stab.

***
Zerah Payet, sa fiy 14-an ki ti’n absant lakour son paran pandan de semenn, in ganny retrouve. Zerah ti ganny trouve e ganny arete  Belvedere Zedi swar. Lapolis pe rod en garson ki ti avek Zerah me ki ti ganny sans taye letan sa fiy 14-an, ki reste Barbarons, ti ganny arete.
Zerah i an bonn sante e son ka i dan lanmen lapolis ek departman zafer sosyal.

***
Rezilta letopsi fer lo lekor Luc Bastienne, sa zonm 37-an ki ti ganny dekouver mor kot i ti pe reste Rivière Anglaise boner semenn pase, in demontre ki se delo dan son poumon ki’n koz son lanmor.

***

Lapolis in dir ki in enposib pour determin lakoz lanmor Sonny Rose atraver letopsi akoz son lekor ti’n preski fini dekonpoze. Lekor Sonny Rose, 40-an, ti ganny dekouver dan en pti lakaz abandonnen Merkredi apremidi dan distrik St Louis.

***
Hilary Adonis ki reste Grand Anse Mahe in kondann 6 mwan prizon pour vol en etranze son sak dan ki ti annan en binok, en tors avek en kannif. Sa lensidan vol ti ariv Barbarons le 12 Zilyet 2009.
Adonis ti kondannen Zedi.