Lasanble Nasyonal i aprouv mosyon pour zidisyer revwar laplikasyon zizman ek santans |02 April 2012

Sa mosyon prezante par manm elekte pour distrik Anse Boileau Bernard Arnephy pe osi demande ki sa pratik santans ki mars ansanm i ganny seryezman dekouraze dan ka kot anprizonnman bann ki koupab i konsernen.

Bann manm parti mazoriter ti aprouv sa mosyon pandan sesyon Mardi pase tandis ki lider lopozisyon dan Lasanble onorab David Pierre pa ti vote.

Onorab Arnephy ti dir ki sa lape e larmoni ki pep Seselwa i anvi zouir i selman kapab vin posib si en bon sistenm lalwa ek lord i ekziste dan nou pei.

I  ti fer resorti ki lakantite krim ki ganny rikorde dan pei ozordi pe kontinyen ogmante  akoz sa ki in dir i defayans e inefikasite sistenm lazistis kriminel pour ranforsi bann lalwa kriminel ki egziste.

Sa i fer ki en kantite lofans kriminel pa ganny detekte e bann ki ganny detekte souvan pa ganny rezourd a traver en zizman ki zis e ekitab e parfwa bann ki ganny prosekite pa ganny kondannen.

«Avek lapel ki Prezidan James Michel in fer dan son diskour lo leta lanasyon pour ki nou kominote i vin en landrwa kot i gou pour viv i enportan alors ki serten pratik kriminel i ganny seryezman dekouraze a traver bann santans ki pli sever e ki reflekte lanpler serten krim ki ganny komet tel ki vol,»  onorab Arnephy ti dir.

I ti azoute ki sa mosyon i demann osi ki sistenm zidisyer pour aplik santans ki pou reflekte vre lanpler sa kalite krim e i ti fer referans spesifik lo vol kont endividi e son propriyete.

I ti fer resorti ki dapre sours lapolis, statistik kolekte ziska 2010 i montre ki bann ka vol dan pei i reste o e sa i montre en nesesite kler pour adres sa problenm enkyetan dan en fason pli serye  e pli byen kordinen.