HFC i entansifye mezir kont kliyan ki pa onor zot lagreman


13-April-2012

Depi komansman sa lannen, HFC in entansifye sa bann mezir e pandan sa dernyen 2 ou 3 mwan in repran 8 lakaz enpe partou dan bann distrik kot bann kliyan pa ti pe onor zot lagreman par abandonn sa bann lakaz oubyen met lezot dimoun reste ladan ilegalman. HFC pe osi travay avek 25 fanmir dan nouvo vilaz lo Ile Persévérance ki pa pe fer zot repeyman parey zot ti’n dakor.

Direkter zeneral bann propriyete ek lavant kot HFC, Msye Timothe Sinon in dir ki sa lakonpannyen pe konstate ki deplizanpli i annan plis lakaz ki pe ganny mal servi alor zot in pran en lapros pli proaktiv e pli strikt dan fason ki zot adres bann sityasyon ki devlope lo bann housing estate.

Fodre dir ki letan bann kliyan HFC i abandonn zot lakaz koumsa, diferan aktivite ilegal tel parey prostitisyon, konportman antisosyal e trafik drog i deroule dan sa bann landrwa.

«Nou’n konstate ki bann ka parey pe ogmante anmezir ki lakantite housing estate osi i kontinyen ogmante.» Msye Sinon in dir .

In fer resorti ki en tel lapros pe ed HFC pour annan plis kontrol ek lord dan sa bann  housing estate.

Msye Sinon i dir in annan ka kot letan HFC in kontakte sa bann propriyeter konsernen zot in volonterman rann sa bann lakaz oubyen bann lokater ilegal ki pe reste dan sa bann lakaz in dakor pour sorti. Me in osi annan ka kot dimoun in reziste e vi ki HFC pa ti fer lagreman avek sa bann dimoun, dan bann sirkonstans koumsa HFC i rod rekour legal pour repran sa bann lakaz.

An sa ki konsern bann fanmir ki an retar avek zot repeyman Msye Sinon i dir ki byen boner HFC pe travay avek zot pour asire ki zot pa tonb dan aryeraz.

Msye Sinon i dir ki pour lamazorite sa bann dimoun, zot pe aste sa bann lakaz ki pe kout anviron 400, 000 roupi enn e si deza zot pe komans mank zot repeyman zot pou tonb dan aryeraz ki pou fer li difisil pour zot  reste azour e annord avek zot repeyman.

Antretan i osi annan bann dimoun ki’n pran lón avek HFC me ki zot osi pa pe fer byen zot repeyman. Msye Sinon i dir HFC in telefonn zot, ekrir zot me la aprezan zot pe ganny apele lo radyo e sa i bann dernyen lapros avan HFC i rod rekour legal pour adres sa bann ka.

«Tou sa bann ka i montre iresponsabilite e mank respe serten bann kliyan apre ki zot deside pour pa onor zot lagreman avek HFC. Letan zot fer sa zot retard sans en lot fanmir ki  son kondisyon sosyal i grav e i ankor lo lalis pe esper en lakaz li osi,» Msy Sinon ti fer resorti.

In osi dir ki sa lannen HFC pou tre vizilan e strikt lo sa bann ka parey e sa lakonpannyen pe demann manm piblik pour kontinyen korpere e donn lenformasyon lo bann ka ki zot konnen pe arive pour HFC pran aksyon.

Msye Sinon i fer rapel tou kliyan HFC pour mazinen ki ler en dimoun i ganny en lakaz i en gran keksoz, i en sekirite pour en fanmir. Fodre pa ki zanmen zot bliye ki i ankor reste bokou dimoun ki pe esper en lakaz. Alor i enportan ki tou dimoun ki’n ganny en lakaz i onor zot lagreman  pour asire ki lezot fanmir i osi ganny ede.

Send your comment :

Name *

Email *

Comment *