Nouvo sit pe ganny propoze pour Sant Mont Royal |23 April 2012

Sa nouvo landrwa i kot ansyen Youth Residential Treatment Centre, North East Point.
Reprezantan sorti dan Departman Zafer Sosyal, Devlopman Kominoter ek Sant Mont Royal ti vizit sa landrwa semenn pase pour vwar si sa sit i ideal pour reabilit bann pasyan.

Pandan sa vizit sa delegasyon ti ganny sans vwar e diskit bann travay renovasyon ki pou neseser si sa landrwa i ganny aksepte koman nouvo Sant Mont Royal.

Apre sa vizit, en rapor i sipoze ganny fer e prezante avek lotorite konsernen pour ganny laprouvasyon pour re-entrodwir bann servis Sant Mont Royal dan sa nouvo landrwa North East Point.

Bann manm sa delegasyon ki ti pe vizit sa sit ti sekreter prensipal pour devlopman sosyal Linda William Melanie ; sef egzekitif Lazans pour Promosyon bann pti Biznes (Senpa) Penny Belmont ; konseye spesyal dan departman zafer sosyal Marie-Josee Bonne ; konseye spesyal dan departman devlopman kominoter Dan Frichot ; direkter pour proze distrik dan sa departman Daniel Adeline ; direkter Sant Mont Royal Robert Moumou e lezot reprezantan sa sant.