En Moman avek Prezidan-‘Fodre adres problenm sosyal pour anpes degradasyon nou bann aki’


04-May-2012

Dan progranm ‘En Moman avek Prezidan’ ki ti pase pandan wikenn Msye Michel ti dir ki nou pei in reisi met son lekonomi lo en platform pozitiv malgre bann defi ki lemonn pe fors nou fer fas avek.

«Mon kwar nou’n fer ase byen ziska prezan me sa pou ganny degrade si nou pa adres sa bann problenm ki nou pe fer fas avek dan nou sosyete sirtou degradasyon bann valer ki nou annan.

 Bann valer tradisyonnel ki ti fer nou sa pep ini, ki ti konpran e ed kanmarad e ki ti napa sa bann diferan kalite problenm parey nou annan ozordi,» Prezidan ti fer resorti.

Msye Michel ti fer sa bann remark letan i ti pe fer komanter lo en deklarasyon ki i ti fer resaman pandan foronm lo renesans sosyal kot i ti dir ki «plan renesans sosyal pou form labaz nou travay pour sa bann prosen lannen».

Msye Michel in dir ki si nou reisi dan sa plan devlopman sosyal nou ava kapab reetabli bann bon valer kot dimoun ava aret enplik zot dan bann move keksoz me zot ava plito al travay e ganny zot lavi dan en fason onnet.

«Tousala ava ede pour nou annan sa bon kominote e sa meyer sosyete,» Prezidan ti dir.
Msye Michel ti fer resorti ki son plan pour lavenir Nouvo Sesel pa zis baze lo devlopman ekonomik me osi lo devlopman imen ki enkli devlopman zanfan, mentenir e protez dignite dimoun aze e lepanouisman travayer parmi lezot.

Me i ti osi dir ki pour tousala vin realite i depan lo bann valer ki nou devret annan e sa i tonm dan sa plan renesans sosyal ki pou ed nou kontinyen gard nou lekonomi e sikse nou sosyete.

 

 

Send your comment :

Name *

Email *

Comment *