Lider lopozisyon i salye zefor bann fanm saz |07 May 2012
« Nesans en zanfan i anmenn bokou lazwa pour en koup osi byen ki en fanmiy. Sak manman, sak baba, i demann sa swen neseser pandan lansentman, pour asire ki son lasante e sa ki pour son baba i reste entak depi konsepsyon, nesans e apre nesans. Pour asir byennet toulede, manman e baba i depann bokou lo en fanm saz.
« Ozordi (le 5 Me) nou bann fanm saz Seselwa i zwenn avek larestan zot koleg atraver lemonn pour selebre zot lazournen. Mon alor avek gran loner felisit e remersye travay nou bann fanm saz lokal. Ozordi, zot pe fer fas avek bokou defi, me sa ki nou kontinyen war, se ki zot pe kontinyelman ofer sa bon servis bann fanmiy Seselwa. Pour sa mon dir zot bravo.
« Zot lakonplisman in prouve atraver rediksyon dan to mortalite dan baba, rediksyon mortalite manman ki perdi zot lavi ler pe donn nesans, baba ki ne avek mwens konplikasyon, pour mansyonn enn de. Sa i demontre rezilta sa bon travay ki zot pe fer dan klinik prenatal e pos-natal. Sesel i fyer pour annan zot, akoz lavenir en pei i depan lo son zenerasyon fitir, enn ki merit an bonn sante.
« Mon ti a kontan profite pour ankouraz plis zenn fiy ek garson pour zwenn sa profesyon, pour ki i a retir presyon aktyel lo sa pti gin fanm saz ki nou aktyelman annan dan pei. Mon osi fer en mansyon spesyal pour bann zenn msye ki’n zwenn sa lekip e ki pe pran swen avek lasante bann manman ek zot baba.
Mon swete ki ozordi zot pas en bon lazournen e ki zot kontiny sa bon travay e byensir en gran mersi e kouraz pour zot tou. »