Kominike Lapolis


22-May-2012

Lapolis, ki pe fer lanket dan sa ka, ti pe swiv devlopman dan kondisyon lasante Jason tre pre e swivan son lanmor zot pe konplet sa ka pour anvoy biro Prokirer Zeneral pour aksyon apropriye.

********
Alison Hoareau, en pti fiy ki ti pou ganny 2-an an Zilyet, ti mor Vandredi pase apre ki jeep ki i ti ladan ti perdi kontrol, savire e tonm lo semen dan distrik Au Cap.

Alison ti ganny transporte Lopital Anse Royale kot i ti ganny sertifye mor.
Dan sa jeep ti osi annan drayver ek de madanm.

********
Onz sispe pirat Somalyen ki ti ganny remet avek lotorite Sesel Sanmdi le 19 Me in pas ankour yer e zot in ganny rimann ziska le 4 Zen.

Sa bann sispe ti ganny arete le 11 Me  par HNLMS VAN AMSTEL, en bato Olande ki pe partisip dan loperasyon Atalante – en loperasyon kont piratri dan rezyon lakot Somali avek korn lafrik.

HNLMS VAN AMSTEL ti entersepte e mont abor en dav ki sa letan ti pe trenn 2 skif ki pirat ti’n servi pour fer zot latak ladan avan pran otaz 17 Iranyen.

O moman ki zot ti ganny sove manm lekipaz sa dav Iranyen, ki apel Jahan, ti raport avek komandan HNLMS VAN AMSTEL ki zot ti ganny pran otaz 10 zour pase.

Abor sa dav ti annan fizi AK 47 ek aminisyon ki’n egalman ganny remet avek lotorite lokal konman egzibit pour lanket.

********
Magid Moustache ki reste La Retraite in kondann 9-an edmi prizon pour lofans kas lakaz e vole. Moustache ti kondannen Zedi pase.

********
Roger Pool, aze 20-an e ki reste Anse Boudin, Praslin, ti yer ganny en santans 3-an prizon pour lofans pran larzan lo fo preteks avek son viktim. Pool ti komet sa lofans Vandredi pase letan i ti pran serten sonm larzan avek en koup Alman an fezan krwar ki i pou anmenn zot ekskirsyon lo son bato son lannmen Sanmdi.

*********
En zonm 27-an ki reste St Louis, sispe dan 3 lensidan vol sennon dan likou son viktim, ti pas ankour yer e ganny rimann ziska le 28 Me. De dan sa 3 lensidan vol ti ariv pandan mwan Avril e lot ti ariv le 2 Me. Tou le 3 ka ti ariv dan rezyon lavil.

********
En zonm 48-an ki reste Anse Royale in pas ankour yer e ganny rimann. Sa zonm i sispe dan en lensidan kas lakaz e vole ki ti ariv le 1 Me Sancta Maria.

Send your comment :

Name *

Email *

Comment *