Artis lokal pou promot renesans sosyal |23 May 2012

         
Minis Meriton pe adres bann artis pandan rankont yer

Sete tyermenn komite Renesans Sosyal Vincent Meriton, ki osi Minis pour Zafer Sosyal, Devlopman Kominoter ek Spor, ki ti fer sa demann pandan en miting yer kot sant konferans enternasyonal.

Plizyer artis renonmen tel parey Tony Joubert (Raspyek), Jean Ally, Essay Quatre, Sandra Esparon, Jahna, Michelle Marengo ti parmi bann ki ti partisip dan sa rankont en demi zournen.

Minis Meriton ti dir ki bann artis Seselwa i annan bokou talan pour fer pase bann bon valer atraver zot bann parol dan zot sanson.

I ti azoute ki zot osi annan bokou lenfliyans lo bann zenn.
Bann artis ti ganny sans pour dyalog avek minis lo zot lopinyon lo bann valer renesans sosyal osi byen ki bann proze ki kapab ganny fer.

Serten ti fer resorti ki i neseser met lanfaz lo spirityalite dan bann konpozisyon pour pozitivman enfliyans bann zenn.

Ti osi annan propozisyon pour servi serten ekstre bann sanson pour met dan bann ladvertisman lo televizyon SBC.