Profil en fermye – Gerard Solin-‘Plante i mon lavi’


08-June-2012

Gerard i met devan son bann konsern avek sef egzekitif Lazans Lagrikiltir, Msye Marc Naiken

I annan anviron 20-an depi ki Gerard pe fer lagrikiltir dan sa landrwa apre ki i ti’n ganny sa morso later avek gouvernman pour akonpli son rev annan son prop laferm.

Ozordi Gerard, ki konsantre lo plant plis bann gro manze parey manyok, patat ek bannann, i dir i satisfe avek son lavi koman en fermye.

“Si ou travay dir, i annan rannman dan lagrikiltir,” Gerard i dir.
Gerard i fer resorti ki in toultan kontan plante e pour li, apard son gannypen, lagrikiltir i osi son pastan.

Gerard, ki travay litousel lo son laferm, i rod enn de zonm zournen pour ed li selman ler i santi sa i neseser.

Gerard i krwar si en dimoun i anvi reisi dan lavi fodre i travay dir.
En lazournen travay pour li i komans dan anviron 7.30 toulezour e termin dan 6.30 aswar, me sa i tou depan lo kalite travay ki i fer sak zour. I annan ler i kapab fini pli tar ouswa pli boner.

Me kantmenm i annan plis gro manze lo so laferm, Gerard i osi plant enpe fri ek legim.
“I bon annan enpe dan tou,” i dir.

Parey lezot fermye dan sa landrwa, pli gro problenm ki Gerard pe fer fas avek se voler ki vin rekolte kot zot pa’n plante.

“I vreman dekourazan letan ou’n rente toulezour e alafen lezot dimoun ki vin rekolte fri ou travay,” Gerard i dir.

I fer resorti ki son bitasyon i ase gran e i pa posib pour vey voler.
I dir ki i annan apepre 3-an depi ki voler pe devaliz li.

Letan sef egzekitif Lazans Lagrikiltir, Msye Marc Naiken, ek lezot zofisye ti vizit li resaman, Gerard ti profite pour met tou son bann konsern devan e demann led minister.

Me Gerard i en dimoun determinen ki kontan son travay e pour li napa pli gran satisfaksyon ki letan ou kapab vann e vwar ki bann kliyan i toultan pe vin rod ou bann viv.

I dir ki laplipar letan kliyan i vin kot limenm pour aste bann gro manze ki servi pour fer bann snacks avek.

I osi annan lezot pli pti kliyan e son zour ki i al bazar.
Vi ki i kontan plant bokou gro manze e manyok sirtou i vin tre byen lo son laferm, Gerard pe ganny led departman lagrikiltir pour li fer lesey avek bann nouvo varyete sa kalite gro manze.
Aktyelman delo i osi en lot gro problenm ki Gerard pe fer fas avek.

Antretan ki PUC ek Minister Lagrikiltir i tonm lo en konpromi lo sa resours tre enportan, Gerard ek lezot fermye zot bezwen kontinyen depan lo lapli ek zot pti sours delo dan kolin montanny.
 
Marie-Anne Lepathy

Send your comment :

Name *

Email *

Comment *