Nouvo versyon kreol Liv Ezai in lanse |07 July 2012

Sa liv, ki kout R50, i deza anvant dan laboutik Seychelles Bible Society, ki sitie dan Huteau Lane Complex Victoria.

Tyermenn sa sosyete, Paster Michael Bijoux, in dir ki Liv Ezai i form parti proze pour tradwir Labib antye.

« I annan en komite ki travay lo sa tradiksyon e sa i ganny fer dan diferan faz, » i ti azoute.

Sete an 2000 ki Nouvo Testaman ti ganny lanse e an 2003 travay ti konmanse pour tradwir bann diferan liv dan Ansyen Testaman.

Paster Bijoux in dir ki sa proze pour konplet tradiksyon Labib antye i ekspekte konplete lannen prosen.