Kominike Lapolis


21-July-2012

Premye lensidan ti raporte ariv La Retraite kot en msye 54-an ti raporte ki en zonm avek 2 madanm ti’n pik li lo son ledo letan zot ti atake e vol li. Swivan lanket lapolis ti aret e anmenn sa 3 sispe ankour kot zot in fer 14 zour lo rimann avan ganny large lo serten kondisyon ki enkli en kosyon 10,000 roupi sakenn.

Lapolis in fini konplet lanket dan sa ka e sa 3 sispe pou repas ankour le 3 Out kot zot ekspekte ganny sarze.
Sa konplenan msye pe ganny swiv par lotorite medikal.

Sa lot rapor ti ganny fer le 30 Zen par en madanm ki dir konmkwa en zonm ti menase pour pik li avek sereng, antre ek li dan son loto lo carpark dan zanmerant waterfront, fer li dray ziska dan zanmerant premye ronpwen zil Perseverance. Arivan anndan obor lanmer ki vir avek ex “Casamar”, sa zonm ti’n fors li bwar en likid ki ti dan en boutey. Sa madanm ti raporte ki sa ki i ti’n konsonmen ti’n rann li sou e  ler i ti reveye e repran dan limenm i ti ganny sans demar son loto e sove lefet ki sa zonm ti enpe a lekar avek son transpor.

Sa madanm ti egalman raporte ki en sonm larzan ki ti dan son sak ti’n ganny vole. Konpare avek premye ka kot mark pike ti ganny trouve lo sa msye, dan ka sa madanm egzaminasyon fer par lotorite medikal pa’n reisi arive dekouver mark pikir lo li. Toudmenm li osi in ganny swiv par lasante.

Lapolis i ankor pe kontiny zot lanket dan sa ka e pe demann manm piblik ki annan lenformasyon lo sa ka ki kapab ed zot avek zot lanket pour kontakte biro CID.

Send your comment :

Name *

Email *

Comment *