Kominike Lapolis


28-July-2012

Ziz dan sa zafer ti pas santans lo Freminot Zedi swar apre ki tou manm ziri ti’n trouv li koupab pour touy Joubert.

***
Lapolis in raporte ki Mervin Raoudy, ki’n donn son ladres koman Cascade ek La Louise, in kondann 8-an prizon pour vole dan en lakaz Providence ant Fevriye ek Mars 2002. Bann propriyete ki Raoudy ti vole ti enkli bizou, aytem elektronik e lezot pour en valer pros 60,000 roupi.

***
Dan en lot ka, en zonm 37-an ki reste Mont Buxton ti pas ankour yer e in ganny rimann ziska le 9 Out. Sa zonm i sispe dan 2 lensidan kas batiman e vole e en lot lofans kas batiman avek lentansyon pour vole. Enn dan sa bann lensidan ti ariv pandan mwan Zen tandi ki sa 2 lezot ti pandan sa mwan Zilyet.

***
Lapolis in osi raporte ki sa zonm 65-an ki’n mor dan son lakaz tar Zedi apremidi Vilaz Ste Andre Cascade i Msye Raja Victor.

Msye Victor ti pe reste ansanm avek son konpanny ek son manman. Se son manman ki ti raport avek lapolis ki dan ver 3er i ti’n donn Msye Victor enpe gloukoz parey labitid e apre Msye Victor ti al repoze. Enpe plitar ver 4er son konpanny ti al revey li pour pran son ben e la i ti trouve ki Msye Victor pa ti pe reazir. Se a sa moman ki zot ti rod lasistans medikal e lapolis ti ganny enformen lo sa lensidan. Lapolis pe atann rezilta letopsi pour determin lakoz lanmor Msye Victor. 

***
Lapolis in osi dir ki i pe al entansifye son loperasyon pour rod Michel Mirabeau ki sispe dan plizyer ka. Lapolis ti’n donn Mirabeau 24er pour rann so lekor. Sa dele letan ti ekspire 6er diswar Zedi e lapolis ti donn li ankor en pe plis letan pour raport kot nenport kordgard. Vi ki Mirabeau pa’n rann son lekor, lapolis pe demann sipor piblik ki konnen kote i ete pour donn zot lenformasyon pour fasilit son larestasyon.

Send your comment :

Name *

Email *

Comment *