Kominike Lapolis |10 August 2012
Sa restriksyon lo lavant lalkol i neseser pour fer sir ki eleksyon parsyel lezislativ dan sa distrik i deroul dan lord ek lape.
Ban lotorite konsernen pe demann tou dimoun ki annan laysenns pour vann lalkol dan distrik Anse Aux Pins pour swiv sa restriksyon akoz aksyon sever pou ganny pran kont sa ki pa respekte sa lord.
***
Lapolis in raporte ki en zonm 38-an ki reste Côte d’Or, Praslin, in pas ankour e ganny rimann yer konman sispe dan lensidan vol masin bato lo Praslin le 26 Zilyet.
Sa sispe pou repas ankour le 16 Out.
***
Touzour dapre lapolis, en zonm 52-an ek en madanm 27-an in osi rimann 8 zour apartir yer pour asiste en kondannen ki ti’n vin lo vizit dokter Lopital Sesel pour antre avek drog danzere dan prizon.
Larestasyon sa 2 sispe ti en travay konzwent ant lapolis ek lotorite prizon. Drog dekouver e sezi an posesyon sa kondannen letan i ti ariv kot prizon i sispekte i eroin.
En sarz pou ganny mete kont sa kondannen depandan lo kantite granm sa sibstans ki’n ganny dekouver avek li.
Lapolis in azoute ki i fer dezyenm fwa sa semenn ki dimoun in ganny atrape pe esey anmenn drog kot prizon.
Mardi en zonm 43-an ti ganny rimann pour lofans posesyon drog ilegal ki sispekte i hashish osi byen ki pour lofans posesyon propriyete vole.
Larestasyon sa zonm Mardi dan distrik Anse Royale ti egalman en travay konzwent lotorite prizon ek lapolis.
Antou lapolis ti dekouver e sezi en serten kantite drog ilegal ki zot sispekte i hashish, 5 telefonn mobil, en bonpe bwat sigaret Mahe Kings, plizyer pake papye sigaret, brike, batri ek charger telefonn ki sa sispe ti’n planifye pour fer antre prizon.
Sa sispe pou repas ankour le 17 Out.
Antretan, lotorite konsernen pe ankor enn fwa averti manm piblik an zeneral ki aksyon sever pou kontinyen ganny pran kont nenport ki ki esey fer antre okenn aytenm ilegal prizon.
***
En zonm ki reste Salazie, Praslin, ti formelman ganny sarze yer e ganny rimann prizon ziska le 14 Out pour lofans vol kont touris. Sa lensidan ti ariv lo lans Côte d’Or le 29 Zilyet.