Lanbyans anba koko i donn lanvi glise dan salon |25 August 2012

Sa dernyen travay par en group zenn artis pe aktyelman fer en sikse remarkab e i vo lapenn met en kopi orizinal dan ou koleksyon.

Enn bann artis lo sa albonm, Curious, ti dir zournal Nasyon ki sa non anba koko i lide en lot zenn, Extra Big, e zot in alafen dakor pour azout mo lanbyans avek.

«Lide en tel albonm se pour fer en travay avek bann zoli sanson ki piblik i kapab ekoute e apresye,» Curious ti dir.

I ti azoute ki albonm pe vann parey gato so. «I paret mwan nou pou dwa albonm akoz lavant pe al tre byen lo Mahe ek Praslin. Albonm pou an vant lo La Digue aparti sa wikennn,» Curious ti azoute.

Sa zenn artis, ki ti vin popiler lo lasenn lanmizik lokal avek son sanson Boul Retour, i dir ki i pa ti difisil pour ganny bann santer ek mizisyen pour partisip lo sa albonm akoz lamazorite zot i konn kanmarad tre byen.

«Vurna, Ion Kid, Aplus, Sandra e mwan menm, nou ti lekol preski menm letan Anse Royale segonder e nou’n konn kanmarad dan lanmizik depi tou sa letan. Alors in ase fasil pour nou met lide ansanm.

Lezot artis parey Ion Kid, Magnificent ek Extra Big nou abitye zwenn dan bann spektak Cable Tune,» Curious ti azoute.

Bann sanson byen ritme lo sa albonm i enkli Dan mon rev par Extra Big, Curious & KJ ; Ou sa oule par Sandra & Damian Amabe ; Zoli pti manmzel par Aplus ; Koupab par Curious ; Ou’n war mwan par Alisha ; Pa kwar zot par Master Emel ; Sove nou de par Curious & HB ; Lannwit Fou par Magnificent & Ruben ; Refiz par Ion Kid ; Ki kote par Vurna & Vanessa ; Les  mwan kontan ou par King C & Lil Tone ; Nou sekre par Champion ; e Love Identity par Ion Kid & Dominic.

Zis pour rapel ki Ou’n war mwan sante par Alisha i repons sanson Ion Kid avek tit Mon’n war ou ki’n fer bokou sikse.

Tou sanson in rikorde e mikse kot stidyo Bloodline eksepte sanson Dan mon rev ki’n rikorde e mikse kot stidyo Extra Big Sound.

Bann mizisyen ki’n partisip lo sa albonm i Roland Marengo (gitar bas), Melval Magnan (gitar lid ek lakonpannyman), Alex Brioche, Extra Big, Ruben, Ion Kid ek Curious (kibord).

Zis pour rapel zot ki sa group mizisyen ek santer i annan lide fer en dezyenm albonm me tou pour depan lo lavant sa enn premye.

En spektak dan Sant Konferans Enternasyonal i osi lo progranm e sa osi i depan lo sponsor e se pour sa rezon ki Curious i envit tou bann ki kwar zot kapab ede finansyerman pour met sa group lo lasenn pour kontakte li lo nimero 2543225.

G. G.