Josephine Bibi i selebre 101-an


24-September-2012

Avek en pti pe lasistans, Madanm Bibi i koup son gato lanniverser

An loner Madanm Bibi, osi konni konman Manman Fis, ti annan en pti rankont kot lakour enn son fiy, ansyen manm lasanble Ginette Gamatis. Seremoni ti konmans avek en lanmes selebre par Per Thierry e animen par bann zanfan, pti zanfan e aryer pti zanfan Madanm Bibi.

Madanm Bibi, ki annan kat fiy ek de garson, e bokou pti zanfan ek aryer pti zanfan, ti byen vokal e ti pe swiv tou sa ki ti pe arive otour li.

Dan son zoli resanz blan, Madanm Bibi ti asize dan son sez doner, pandan ki son bann zanfan ek pti zanfan ti sant bann sanson ki zot ti’n prepare pour li pour sa lokazyon.

Tou dimoun ti sant sanson lanniverser e ler ti’n arive pour li koup son gato, i pa ti ezite pour fer li, avek en pti pe lasistans.

Madanm Bibi – ki son bann zanfan ti dekri konman an bonn sante – ti menm bwar en pti lasante e montre ki i ti byen ankor kapab.
   
Bann envite ti osi kapab swiv en legzibisyon portre ki ti’n ganny prepare -- portre Madanm Bibi pandan ki i ti pe selebre bann diferan laz dan bann lannen avan, menm avan ki i ti ariv 100-an.

Ti osi annan bann portre dan bann diferan moman son lavi, menm portre ki i ti tire avek Prezidan Larepiblik James Michel resaman.

En reprezantan Lasosyasyon Trwazyenm-Az ti prezant Madanm Bibi avek en meday pour mark sa lokazyon e apre bann envite ti enn par enn donn sa envite-d-oner son bann kado lanniverser.

Son bann zanfan ti apre rakont bann pti zistwar ki zot ti annan baze lo zot leksperyans an grandisan avek Madanm Bibi, e osi ki mannyer lavi ti ete pandan sa bann letan.
Lazournen ti kontiny avek en dezennen.

Send your comment :

Name *

Email *

Comment *