Gouvernman i dir pa pou vann flat Dolphin Court avek lokater


29-September-2012

Sa ti ganny dir par Minis pour Litilizasyon Later ek Lakaz Christian Lionnet, pandan sesyon kestyon dan Lasanble Nasyonal Mardi.

Minis ti pe reponn kestyon Onorab David Pierre, ki ti pe demande si bann lokater Dolphin Court pou vin popriyeter san bann flat alavenir.

Msye Lionnet ti dir ki pozisyon gouvernman pour pa vann sa bann flat Dolphin Court i akoz si Housing Finance Company (HFC) i vann sa bann flat, son nivo depresyasyon pou ase o, e bann dimoun ki ti pou al aste sa bann flat pou vwar zot pe bezwen envestir konsiderableman.

« Vi ki en blok flat i bezwen ganny trete konman en condominium, gouvernman i osi santi ki i pou difisil pour sa bann dimoun rod loan e kordin bann gran travay reparasyon,» i ti dir.

Minis ti dir ki ler sa bann lokater i bouze pour al reste dan en landrwa pli permanan, en poursantaz sa larzan ki zot in peye atraver zot lokasyon, pou ganny kontribye anver zot nouvo lakaz avek kondisyon ki zot napa aryeraz.

I ti azoute ki gouvernman i annan en plan pour redevlop Dolphin Court letan sa proze ki anplas i ariv alafen son life-span, e ki i nepli ekonomikman vyab pour mentenir.

«Sa bann lokater pou a sa pwen la ganny en lot landrwa reste e zot relokasyon pou ganny konsidere baze lo priyorite ki lotorite distrik i desid lo la.»

Batiman Dolphin Court i annan 21 flat e i pe ganny mentenir par lakonpannyen HFC.

Send your comment :

Name *

Email *

Comment *