Final konkour diskour-Lekol Beau Vallon segonder i ranport premye pri |27 October 2012

Sa ti enn bann aktivite organize dan kad 27enm edisyon Festival Kreol, ki ti konmanse yer.
Set lekol segonder ti pran par dan staz eliminatwar sa konkour diskour e alafen selman kat lekol ti ganny slekte pour final.

Sak lekip ti ganny 15 minit pour fer zot prezantasyon e zot ti osi lib pour swazir zot tenm.
Bann manm ziri ti servi en seri kriter pour ziz bann prezantasyon e sa ti enkli litilizasyon langaz, fason koze, zistifikasyon e fason ki zot siport zot largiman.

Dezyenm pri ti ranporte par lekol Rivière Anglaise, swivi par lekol Plaisance segonder dan trwazyenm plas. Katriyenm pri ti ranporte par tim ki ti sorti lekol Anse Royale segonder.

Pri pour meyer tyermenn ti ranporte par Camilla Lusta e son koleg Rebecca Hoareau ti ganny zize konman meyer kozer. Sabrina Esther ti meyer lokiter pour sa konpetisyon. Sa trwa etidyan i sorti lekol Beau Vallon segonder.

Lezot lekol ki ti’n pran par dan sa konpetisyon ti osi ganny prezante avek en sertifika.