Sesyon demann kestyon dan Lasanble Nasyonal-Minister Ledikasyon pe ranforsi mezir kont vandalizm kot bann lekol


13-November-2012

Sa proze ki apel Sensitive building security pe vwar sa 2 lekol konsernen travay dan en fason pli pros avek Minister Ledikasyon, lazans sekirite ek lezot akter enplike pour kapab vwar e al afon dan sa bann problenm, etidye e vwar kwa ki neseser pour kapab ranforsi oubyen annan en sistenm sekirite ki marse kot sa 2 lekol.

Lenformasyon ki pou kolekte sorti kot sa 2 lekol a permet minister konnen si i annan nesesite pour revwar sistenm sekirite kot tou bann lekol.

Minis pour Ledikasyon Macsuzy Mondon ti donn sa bann detay dan Lasanble Nasyonal Mardi pase letan i ti pe reponn kestyon lo sa size poze par bann manm.

Manm elekte pour Mont Fleuri Beguitta Jeannevol  ti demann Minis Mondon si son minister i annan plan pour revwar sekirite dan bann lekol anvi ki vadalizm pe kontinyen.

Minis ti fer resorti ki Minister Ledikasyon in outsource servis sekirite kot lekol depi 2006. I ti dir ki o komansman ti napa bokou lazans sekirite ki ti anrezistre e sa minister ti bezwen met plizyer lekol anba responsabilite en sel lazans e sa ti poz bokou difikilte akoz serten sa bann lazans pa ti pe kapab delivre dapre lekspektasyon minister.

Me i ti fer resorti ki aprezan ki i annan plis lazans ki’n montre lentere, minister in redistribye bann lekol avek zot e sa i fer ki diferan lazans i annan mwens lekol e sa i fer ki zot pe donn en pli bon servis. Minister in osi fer met dan zot kontra en clause ki pou permet li reklanm avek bann lazans sekirite kou  depans ki asosye avek vandalizm ki arive kot bann lekol si lanket i montre ki in annan neglizans lo zot par.

Minis ti dir ki malgre sa i ankor annan problenm vandalizm kot bann lekol, me ki an zeneral in annan en rediksyon dan lakantite ka.

Manm elekte pour Anse Boileau Bernard Arnephy ti anvi konnen ki kalite sistenm monitoring entern  Minister Ledikasyon i annan an plas pour asire ki sa bann lazans sekirite i delivre e zot prezan kot bann lekol a tou moman sirtou dan wikenn.

Minis i dir ki minister i fer bann spot check e i ganny lasistans avek lapolis kot i neseser.

Manm elekte pour Pointe Larue Jennifer Vel ti lo son kote demann minis si depi ler son minister in outsource  servis sekirite in annan en logmantasyon dan vandalizm kot bann lekol.

Minis ti fer resorti ki in annan bokou amelyorasyon dan bann problenm ki zot ti pe rankontre kot bann lekol me i reste ankor travay pour fer pour anpes vandalizm konpletman kot bann lenstitisyon skoler.

Manm elekte pour Roche Caïman Joevana Charles ti anvi konnen si minister i annan lentansyon entrodwir en Teacher’s Council. Se manm elekte pour Les Mamelles Emmanuel Fideria ki ti demann sa kestyon dan labsans Madanm Charles.

Minis ti dir ki Education Act 2004, seksyon 87 i fer provizyon pour minister kre en Teacher’s Council.

I ti dir ki dan konteks reform dan sistenm ledikasyon, travay pour devlop Teachers Council ti entansifye an 2011 e ozordi tou bann travay teknik ki annan pour fer avek kreasyon sa council pe ganny finalize. Minis ti fer resorti ki pour kapab met en tel council anplas i demann bokou travay e refleksyon.

«Si nou anvi ki i byen ganny enplimante nou bezwen asire ki tou son bann regilasyon e tou lezot keksoz ki neseser pour fer li fonksyonnen i byen anplas avan ki i lanse,» Minis Mondon ti dir.

I ti osi asir Lasanble ki en fwa sa council i ganny etabli tou ansennyan dan Sesel pou bezwen anrezistre ki swa zot travay dan lekol prive oubyen lekol Leta.

En tel konsey pou permet Minister Ledikasyon sertifye e anrezistre tou bann ansennyan ki annan atraver sistenm ledikasyon dan pei antye.

Sa i ekspekte permet sa minister dekouver ki bann mankman ki annan parmi bann ansennyan an term kalifikasyon, leksperyans e permet minister pour kapab osi organiz pli byen bann formasyon e devlopman profesyonnel pour bann ansennyan.

Minis Mondon ti osi reponn plizyer lezot kestyon ki annan pour fer avek scheme of service pour ansennyan, lezot non-teaching staff, nesesite pour tou lekol annan en counsellor kalifye, posibilite pour revwar ledikasyon PSE dan bann lekol e mezir kont etidyan ki detri propriete lekol.

Send your comment :

Name *

Email *

Comment *