Sesyon demann kestyon dan Lasanble Nasyonal-‘Plis zefor pe ganny fer pour relev lagrikiltir’


28-November-2012

Se minis ki responsab pour sa minister, Msye Peter Sinon, ki ti dir sa yer pandan sesyon demann kestyon dan Lasanble Nasyonal kot i ti pe donn lenformasyon konsernan son minister.

Onorab Maria Payet-Marie ti demann Minis Sinon rol son minister pour ankouraz plis zenn pour pran en karyer dan sekter lagrikiltir vi ki bann propriyeter laferm pe ganny difikilte pour retenir bann zenn ki zot anploye.

I ti dir ki travay pe ganny fer avek Minister Ledikasyon e resours pe ganny mete dan lekol lagrikiltir e maritim pour anmenn sa de lekol pli pre avek bezwen lendistri.

Minis Sinon ti dir ki son minister pe met a dispozisyon bann zenn loportinite ki annan bokou prospects ladan.

I ti azoute ki i devwar son minister pour relev sekter lagrikiltir e ankouraz bann zenn pour pran bann karyer ladan.

Pandan sa sesyon Minis Sinon ti osi anonse ki son minister in met devan Cabinet en propozisyon pour annan en lotorite ou lazans ki pou zer later lendistri.

Minis Sinon in dir ki apre ki Cabinet in pronons lo sa propozisyon, sa in ganny remet avek biro Atorni Zeneral e en propozisyon final pour ganny resoumet avek Cabinet.

I ti osi donn detay lo plan son minister pour fasilit bann dimoun ki dan pti biznes avek landrwa pour zer zot biznes lo Praslin.

Minis ti dir ki mazorite bann later dezinyen pour bann pti biznes lo Praslin i trouve lo zil Eve. Lo Praslin i annan zis sa morso teren ki an se moman pe ganny okipe par Seychelles Trading Company vizavi airport Amitié ki pou ganny pase avek Minister Resours Natirel ek Lendistri evantyelman kan sa lakonpannyen i deside kit sa landrwa pour al lo zil Eve.

Bann teren lo zil Eve in ganny kategorize pour bann biznes tel ki warehouse, storage, lendistri relye avek lanmer e plizyer lezot ankor.

I annan 53 morso teren ki’n ganny divize e dezinyen pour sa bann tel aktivite. Dan sa 53 morso teren, 41 in ganny pas bay lo la e alor i reste 12 teren ki’n ganny dezinyen pour bann lezot aktivite.

Minis ti osi donn detay son minister lo plan pour ed bann fermye dan distrik Baie Ste Anne ki pe esper en bout later lagrikiltir.

I ti dir ki son minister in deza ed 15 fermye avek 19 morso later ekivalan 10.7 ektar.

Minis ti dir ki i annan 11 aplikan e prosedir pe ganny fer avek Minister Lamenazman Later ek Lakaz pour donn ankor de dimoun en morso later.

I ti toudmenm fer resorti ki potansyel pour devlopman agrikol i tre limite dan sa distrik e son minister pe fer en legzersis pour evalye potansyel Fond Azore e serten later laba.

Send your comment :

Name *

Email *

Comment *