Pasyan Sant Mont Royal in pare pour refer zot lavi |27 December 2012

Bi sa rankont, ki ti asiste par direkter sa sant Robert Moumou, paran ek manm fanmir sa bann pasyan, ti pour konklir sa progranm rezidansyel pour sa lannen e pour sa bann pasyan pas en moman avek zot manm fanmir e osi bann travayer.

Bann ki ti pe soufer avek problenm labi drog ek lezot sibstans ki enkli lalkol ti remersye bann travayer sa sant pour ed zot kapab sorti dan sa bann sitiasyon e donn zot kouraz pour refer zot lavi.

Zot ti osi remersye e prezant kado avek zot manm fanmir ki ti prezan, pour sipor ki zot in aporte pandan letan ki zot ti dan sa sant.

Judy Brioche, ki ansarz Youth Health Centre, ti osi prezan pandan sa rankont pour prezant en donasyon larzan avek sa sant.

Sa donasyon i sorti lo lapar bann zenn peer educators kot Lakademi Tourizm, La Misère, ki ti anmas sa larzan pandan en aktivite ki ti ganny organize pour komemor lazournen bann zonm resaman.