Dife i konpletman detri en batiman komersyal Baie Ste Anne Praslin |28 December 2012

Personn pa’n ganny blese dan sa dife dan sa batiman ki ti pou Msye Walter Green.

Ti ver 3er15 yer granmaten ki stasyon tenny dife lo erport Praslin ti ganny enformen ki ti annan en dife Baie Ste Anne.

Zofisye ansarz sa loperasyon, Mike Agricole, ti kit stasyon 3er22 avek en kanmiyon ek en pikep avek lekipman ki enkli laponp portab ek en tim 5 zonm pour al konbat sa dife.

An arivan lo teren ver 3er40 sa batiman antye ti anflanm, sirtou sa konpartiman ki ti vann bann materyo parey verni ek lapentir.

Zofisye ansarz ti demann ankor sipor akoz dife ti tro gro e en lot kanmiyon avek ankor 2 zonm ti ariv lo teren ver 4er10.

Ti apepre enn erdtan pli tar ki sa dife ti ganny met anba kontrol e ver 5er50 i ti’n ganny tennyen konpletman.

Bann zofisye tenny dife ti servi sa laponp portab pour ponp delo sale pour osi ede dan sa loperasyon pour tenny sa dife.

Ziska aprezan i pa kler kwa ki’n kapab koz sa dife e lapolis in konmans en lanket.