Lapolis i satisfe avek konportman piblik pandan moman festivite |04 January 2013

Portparol lapolis Jean Toussaint ti pe koz avek medya Zedi apremidi kot i ti dir ki avek bann aktivite ki’n ganny organize partou, zot ban loperasyon in mars a zot satisfaksyon e zot in ganny bokou korperasyon piblik.

«Lapolis ti deplway tou son bann resours pour ganny sifizaman mendev pour nenport sitiasyon ki ti ava kapab arive,» Msye Toussaint ti dir.
 
Malgre bann sitiasyon ti minim, i ti dir ki ti annan serten pti lensidan ki ti’n arive, tel ki serten ka kas lakaz e vole, e bagar kot dimoun ti ganny blese.

«Nou’n osi fer remark ki dan aktivite Street Party ki ti fer le 31 Desanm, ti annan bokou zenn anba laz ki ti pe konsonm lalkol e nou pe lans en lapel avek bann adilt, sirtou bann marsan, pour vin enpe pli konsyan e pour pa ankouraz sa bann tel aksyon. Nou’n osi remarke ki ti annan bokou sopin kraze dan landrwa kot Street Party ti pe deroule,» Msye Toussaint ti dir.

I ti azoute ki lapolis in fer antou 56 larestasyon okour selebrasyon lafen lannen 2012 ek nouvo lannen 2013 – savedir le 31 Desanm ek le 1 Zanvye – me bokou ladan ti bann ka prevansyon.

“Dan sa 56 larestasyon, i annan ki ti ganny large deswit e i osi annan ki’n bezwen ganny detenir.

 E la nou pe demann bann paran ek adilt pour monitor zot zanfan pli pre akoz nou’n osi sezi serten zouti pandan nou bann loperasyon Stop and Search ki nou ti pe fer dan lavil,» Msye Toussaint ti dir.

«Nou pou kontinyen mentenir nou vizibilite lo semen avek nou bann patrol apye, patrol dan transpor e lezot ankor parey check points, e travay pou vin pli profesyonnel.

 Nou pou travay pa zis lo nivo larestasyon, me osi lo nivo prevansyon.»

Lapolis in osi demann bann adilt kot lakour e paran pour vin pli vizilan anver bann bann zafan ki annan akse avek telefonn, sa i sirtou la ki lapolis in resevwar bokou koud telefonn nwizans fer par bann zanfan.