Kominike Lapolis |15 January 2013

En zonm 51-an ek enn 31-an ki reste Corgate Estate, en lot zonm 38-an sorti Foret Noire e en 4enm aze 52-an ki reste Lari Au Claire in ganny anmenn ankour ozordi kot zot in ganny rimann an koneksyon avek sa lensidan ziska le 28 Zanvye antretan ki lapolis i kontiny zot lanket dan sa ka.

Sa 4 zonm, ki ti ganny arete Sanmdi, pe ganny trete koman sispe dan disparisyon zot koleg peser, en ka ki zot ti’n raport avek Gard Lakot ler zot ti ariv ater Sanmdi.

Sa ka ti deswit ganny refer avek lapolis e en lanket ti konmanse.
Patron abor St Maxime, bato lo ki Marcelin ti ete, in raporte ki zot ti kit ater le 9 Zanvye e dan lannwit Vandredi le 11 apre en pti poz sonmey, zot pa ti trouv Marcelin abor.

Sa letan zot ti lo lakot Silhouette. Patron i azoute ki menm si zot ti fer resers lo bato e dan lanmer sa pa’n abouti dan nanryen. Antretan Gard Lakot pe kontinyen avek resers dan zalantour Silhouette.

******
En zonm 40-an ki reste Anse Aux Pins in ganny rimann ziska le 22 Zanvye. Sa zonm, ki ti ganny arete Sanmdi le 12 Zanvye, i sispe dan plizyer lensidan kas lakaz e vole ki’n arive resaman dan distrik Anse Aux Pins.

******
Swivan lanket dan lensidan kot en “warehouse” ti ganny kase e propriyete ganny vole ladan an Novanm lannen pase Providence, lapolis in aret e anmenn 2 sispe ankour. Sa i en zonm 29-an ki reste Au Cap ek en lot 30-an sorti Béolière. Sa 2 sispe ki ti ganny arete Vandredi pe rimann ziska le 25 Zanvye.

******
Lapolis in egalman raporte ki en zonm 25-an ki reste St Louis in ganny rimann prizon pour lofans vol. Lapolis ti aret sa sispe sirplas avek dan son posesyon en ‘mobile’ ki i ti’n vole dan en laboutik Unity House Complex Sanmdi le 12 Zanvye. Sa sispe pou aprezan repas ankour le 28 sa mwan.