Mwens dimoun i al verifye rezis voter sa lannen


26-January-2013

Sef zofisye lanrezistreman Jenny Adrienne in dir ki in menm annan distrik ki pa’n ganny okenn dimoun pour vin enspekte zot non lo rezis voter pandan serten bann zour.

Bann distrik tel ki Au Cap ek Anse Aux Pins in reisi ganny en pti pe plis ki 20 dimoun par zour e distrik tel ki Takamaka in ganny anviron 12 dimoun par zour ki’n vin kot biro lanrezistreman.

Madanm Adrienne in dir ki pour sa lannen, sa legzersis i tre dousman e poursantaz dimoun ki’n al kot bann biro lanrezistreman ziska prezan i vreman ba.

I ti azoute ki an mwayenn selman 230 ki’n al tyek zot non lo lalis e sa i montre ki dimoun pa pe montre gran lentere.

I ti dir ki pandan douzyenm zour sa legzersis, mwens ki 10% voter in partisip dan sa legzersis.
Manm piblik i annan ziska demen depi 10er bomaten ziska 2er apremidi pour zot al kot zot biro lanrezistreman respektiv pour verifye rezis voter.

Aparti Lendi le 28 Zanvye ziska Zedi le 31 Zanvye, biro lanrezistreman pou ouver zis pour bann obzeksyon selman. Sa pou ganny fer depi 3er ziska 6er apremidi.

I enportan pour note ki tou bann ka obzeksyon i bezwen ganny fer dan bann distrik kot bann voter i reste.

Send your comment :

Name *

Email *

Comment *