Polisi gouvernman lo konstriksyon lakaz lo later lagrikiltir pa’n sanze |10 April 2013

Minis ti pe reponn en kestyon lo sa size par manm elekte pour Grand Anse Praslin, Marc Volcère, ki ti anvi konnen si sa minister pe revwar son polisi lo sa size.

Minis Sinon ti eksplike ki ziska ozordi polisi gouvernman konsernan konstriksyon lo sa bann later ki pour Leta i ki sak fermye i kapab konstrir zis en lakaz ki kapab demonte apre, sa apre ki zot in ganny permisyon an ekri avek lazans lagrikiltir.

Sa lakaz i devret ganny fer avek bann materyo ki kapab apre demonte eksepte lakwizin ek lasanmben ki kapab ganny fer an blok.
Minis i dir ki pour lamazorite sa bann lakaz ki son minister in aprouve zot annan 2 a 3 lasanm.

«Sa polisi i ziska prezan ankor parey me i annan serten landrwa kot in annan serten leksepsyon,» Minis Sinon ti eksplike.

I ti dir ki son minister ek lazans lagrikiltir zot bezwen travay pli pros avek lotorite planing pour fer sir ki plan ki ganny aprouve pour konstrir lo sa bann later zot respekte polisi ki anplas konmela.

Minis Sinon i dir ki i annan fermye ki lontan pe reste lo sa bann later ki’n vin devan e eksprim dezir pour en lakaz an blok.

«Me toultan minister konsernen in reziste pour al zwe avek sa polisi,» Minis Sinon ti eksplike.

I ti dir ki minister i konnen difikilte ler fermye i oule bouze e i annan en lakaz ki pa kapab demonte alors i pou bezwen annan demars pour diviz sa bann later pour fer zot vin rezidansyel. Se la kot serten rezidan ki pa kontan loder asosye avek lagrikiltir i kree lezot problenm ki minister i oule evite atraver mentenir sa polisi,» Minis Sinon ti dir.