Kominike Lapolis |10 April 2013

Maria ti ganny admit Lopital Sesel pandan lannwit le 3 Avril apre ki i ti’n ganny tape par en loto La Retraite.

Dapre rapor, drayver sa loto ki ti’n tap Maria ti raport sa lensidan avek lapolis ver 9er diswar apre ki en dimoun ti enform li ki i ti’n tap en zonm.
Ti ver 11er bomaten yer ki en zofisye lasante ti enform lapolis ki Maria ti’n mor dan younit swen entansif Lopital Sesel.

Lapolis pe fer lanket dan sa ka e pe demann motoris konman pyeton pour pran bokou plis prekosyon ek responsabilite letan zot pe servi larout piblik.

Premye ka fatal ti raporte Sanmdi pase apre ki Paul Bibi, sa zonm ki ti ganny tape par loto dan zanmerant Bella’s Boutique, Mont Fleuri apremidi Merkredi le 3 Avril, ti mor.

Aze 44-an, Bibi ti reste Les Mamelles e ti mor Sanmdi tar apremidi dan younit swen entansif Lopital Sesel kot i ti’n ganny admit depi son aksidan.

****
Yannick Constance ki reste Glacis in kondann en total 9-an edmi prizon pour plizyer lofans pran marsandiz lo fo pretans, retenir propriyete ki pa pour li osi byen ki pour servi fo dokiman pour fer tranzaksyon avek. Constance ti komet sa bann lofans an Out lannen pase.

****
Lapolis in osi raporte ki en zonm 29-an ki reste Anse Boudin, Praslin in ganny arete Lendi konman sispe dan 4 lensidan kas lakaz e vole ki’n arive ant le 21 Mars ek le 4 Avril Praslin.
Swivan lanket ki zot pe fer, lapolis in reisi rekiper serten propriyete dan 3 sa bann ka vol.
Sa sispe ki ti ganny arete Lendi e ganny anmenn ankour yer in ganny rimann e pou repas ankour le 22 Avril.