En wikenn manifestasyon spirityel pour komemor 100-an Legliz St André


11-April-2013

Legliz St André i selebre 100-an

Legliz St André ti selebre sa lanniverser le 15 Mars me akoz sa ti tonb dan Karenm ti annan zis en lanmes Action de grâce e bann aktivite komemorativ ki ti konmanse Dimans pase avek louvertir en legzibisyon  lo listwar sa legliz e bann pret ki’n deservi li pe kontinyen sa wikenn.

En komite pour organiz bann aktivite pour sa lokazyon ti ganny met anplas depi Oktob lannen pase.

Sa komite ki prezide par pret sa parwas Gustave Lafortune in planifye pour organiz 100 aktivite pour sa 100-an.

En portparol sa komite in dir ki ziska prezan bokou aktivite in ganny fer e zot ekspekte kontinyen pour ariv 100 ziska lafet St André le 30 Novanm sa lannen.

Bann manifestasyon ki pe organize sa wikenn pou demar avek en veye lapriyer depi 7er diswar ziska minwi demen e sa pou ganny animen par Per Colin Underwood e Per Lafortune.
Dimans depi 9er bomaten ziska midi pou annan lekspozisyon St Sakreman ek ladorasyon ki pou ale ziska midi. Sa pou animen par diferan mouvman ek group dan parwas.

Depi 1er ziska 3er pou annan animasyon par bann diferan pret ki’n deza deservi sa parwas e sa se Per Lonnie Adrienne, Per Eric Leon e Per Lafortune limenm.
Apartir 4er apremidi pou annan en gran lanmes solannel prezide par Monsenyer Denis Wiehe asiste par plizyer lezot pret.

Tou bann parwasyen e lezot pelren sorti dan lezot parwas pe ganny kordyalman envite pour partisipe e demann benediksyon ek lagras St André pour nou bann fanmir e nou pei.

Send your comment :

Name *

Email *

Comment *